Daghan karon ang nakamatikod sa dako na kaayong kausaban sa radio program sa radyo nga mga FM station sa Sugbo kun itandi sa mga tuig 1970’s ngadto sa tuig 1990’s nga dili lang kay nagpalabwanay sa kaanindot sa huni ug mga awit nga ipatukar sa tibuok adlaw ug gabii ang maong mga estasyonan sa radyo kaniadto kun dili nagpalabwanay usab sa katibuok ug kahawot sa mga tingog sa ilang mga DJ nga nag-anchor niini.
Ang mga katigulangan karon nga mahiligon kaayo sa pagpaminaw og maanindot nga mga awit nga nagpaminaw pa gihapon hangtod karong panahona sa radyo nga mga FM station dinhi sa Sugbo.
Matud pa nila nga dako na kaayo karon og kalainan ang programa sa radyo nga mga FM station kay dili man lang ang mga maanindot nga mga huni ug mga awit ang atong mabati kun dili naglakip na usab ang mga lab-as nga balita ug gisal-ot usab sa matag karon ug unya ang mga gitikgitik ug pakatawa nga mga estorya.
Dugang usab nilang namatikdan mao nga ang mga nag-anchor sa programa mahimong babaye o lalaki dili na usab sama kaniadto nga dili lang kay magpalabwanay sa katibuok ug kahawot sa ilang mga tingog kun dili magpalabwanay pa gayod sa kamaayong molitok sa pinulongang langyaw nga Ininglis nga daw giugom ang paglitok ang matag litra nga lisod na kaayong sabton sa mga tawo nga igo lang intawon nga nakatungtong sa ilang pagtungha sa elementarya.
Matud pa nila karon sa mga binag-o na nga programa sa mga FM station sa Sugbo maoy ilang namatikdan nga gipahaum na gayod sa panahon nga maoy gusto sa mga tigpaminaw tungod kay ang mga DJ nga nag-angchor maoy ilang gihimo ang paglitok sa atong kaugalingong pinulongan nga masabtan sa kinabag-ang Sugboanon.