Dako tuod kining kontrobersiya nga gikalambigitan ni Konsehal Gerardo Carillo sa dakbayan sa Sugbo. Kasong kriminal iyang atubangon kun mokiha gayud ang pamilya sa bata nga giingong gihapak kuno niya og bato atol sa rambol sa usa ka bar dili pa lamang dugay.
Hinuon wala pa makadesisyon ang pamilya kun mopasaka ba gayud kini og kaso batok sa maong konsehal. Apan daang giingon sa pulis nga igsuon sa biktima nga kun siya’y pabut-on, angay gayud nga mangita sila og hustisya sa gidangatan sa iyang manghud.
Kun mao kana, nan makapaabot kita og kaso nga ipasaka batok kang Carillo. Dili lalim ang gidangatan sa maong bata, kinsa grabe ang pagkatay-og sa ulo sa dihang gihapsan kini og bato.
Apan dili usab layo ang posibilidad nga makig-settle ang pamilya sa maong biktima. Kini sa rason nga hilom pa sila sa pagkakaron mahitungod sa ilang aksiyon batok sa konsehal.
Hinuon kun walay kasong ipasaka, makaingon kita nga gusto ang pamilya nga magpabayad na lamang. Ila kanang katungod. Siguro kapuyan silang modangop sa korte tungod lagi sa kahasol nga proseso pagkab-ot sa hustisya.
Apan kun tinuoray nga hustisya ang ilang gipangita, nan makuha lamang kini pinaagi sa pagdangop sa korte. Dili gayud mabugtian og sinakong salapi ang hapsay'ng hustisya gikan sa hukmanan.
Ilalum sa korte mahatagan usab si Carillo og katungod pagpanalipod gikan sa maong alegasyon. Panahon sa mga lantugi atubangan sa huwis, dili malalis nga inosente ug limpiyo pa ang mga kamot sa kontrobersiyal nga konsehal.
Hinuon kun aduna man gani settlement nga makab-ot tali ni Carillo ug ang pamilya sa maong bata, nan magkahiusa gayud ang opinyon sa publiko pagtagna diing mga kamot gikan ang tulin nga bato nga mibuslot sa bagol-bagol sa maong batan-on.