1. Pag-angkon nga ikaw wala makadawat sa imong anak -- Kun ugaling ingon nga ginikanan, nakaamgo ka nga ikaw ang hinungdan sa gipakitang ubos nga pagtan-aw sa imong anak, dawata ang kamatuoran nga ikaw wala makadawat sa iyang pagkasiya. Ang pag-angkon sa maong kakulangan mao ang sinugdanan sa kaayohan ug pagtubo.
2. Ipunting ang hinungdan -- Unsay hinungdan nganong imo siyang gisalikway ingon nga imong anak? Kini ba tungod kay dili siya gwapo o gwapa, dili siya lantip og hunahuna ug dili ba nakahupot ang imong anak og mga taras nga dili ka ganahan?
3. Pangayo og pasaylo -- Dili kini makapaubos sa imong kaugalingon ingon nga ginikanan ang mapaubsanong pag-angkon sa imong sayop, makatabang aron ang imong anak, makatugkad pud sa hinungdan sa maong kahimtang. Ania ang proseso:
a. Angkona ang imong sayop
b. Ipunting kun diin ka dapita nasayop
c. Pangayo og pasaylo pinaagi sa pagbungat: “Dong/Inday, Pasayloa tawon si Mama/Papa/Nanay/Tatay!
4. Pangayoa ang kapasayloan gikan sa Dios -- Dad-a ngadto sa pag-ampo ang mga panghitabo tali kanimo ug sa imong anak.
5. Tabangi ang imong anak nga mulambo sa iyang mga talento -- Himoang andam kanunay ang imong kaugalingon aron motabang sa imong anak sa pagtikad sa iyang mga talento ug hilig. Ipakita gayud nga andam ka pagsuporta kaniya ug paggahin og igong panahon aron imong mapadayag ang imong pagdason ug pag-uyon sa iyang mga hilig.
Hinumdomi: Ang kalipay usa ka kahimtang nga nagasukad sa usa ka positibong panlantaw mahitungod sa imong kaugalingon. Mas haom nga sugod sa linghod nga panuigon ang bata maantigong modason sa mga kaantigohan ug mga gasa nga iyang nadawat gikan sa Kahitas-an. Kinahanglang ang maong mga pagdason dili usa ka matang sa pag-ulog-ulog hinunoa, mas maayo gyud nga imong ipakita ngadto sa imong anak nga ang matag binuhatan niya, mahinungdanon alang kanimo ingon nga ginikanan. (Sumpayan pa)