Nindot kaayo nga matugkad nato kining sistima sa anti-oxidant. Unsa ba kini? Ang mga anti-oxidant mao kana ang nagkalainlaing mga bitamina, minerales, enzymes ug uban pa nga kini sila nagtinabangay aron mapugngan ang proseso sa oxidation sa lawas. Nga kun di maatiman anam-anam mangamatay ang atong mga selyula o tisyo kay ang free radicals mao nay midominar sa lawas.
Ang free radicals epekto kini sa grabeng polyuson sa palibot, sobra sa stress, kanunay nabantang sa init sa adlaw, pagkaon nga kulang sa nutrisyon, hinigarilyo ug sobrang inom sa bino ug ubang sobra nga makahatag kadaut sa lawas. Busa aron permi nga duna tay igo nga enerhiya nga di dali maluya o masakit, bililhon kaayo ang mga anti-oxidant sa lawas nga mopalig-on sa pagbatok nga di masakit.
Ang naandan nga proseso sa lawas nato kun magka-edad na ta inanay sab magkaluya o mangamatay ang selyula kay kulangon na ang kapasidad sa anti-oxidant nga maoy mopalig-on sa mga sistima sa kahimsog sa panglawas. Ang atong immune system huyang na, nga dali na kaayo kita mataptan sa balatian. Karon pa, ato nang panagan-an nga dili kita magrabehan kun masakit man gyod.
Bisan tuod kulang ang nutrisyon diha sa atong mga pagkaon, mas bentaha nga himuon natong istilo ang pag-ayuda o pagsuplemento pinaagi sa pag-inom og mga dekalidad nga herbal o organic nga anti-oxidants. Sa ingon, makaseguro kita nga bisan pag ma-edaran na mapabilin gihapon ang kahimsog nato, nga mopalahutay sa lawas nga kapuslan pa ang lugway sa malipayon nga kinabuhi.
Niadtong may daghan nang gipamati nga kabug-at sa balatian, ayaw pakawa sa paglaum bisan pag kanser basta mahibaw-an lang dayon, may purohan pang maalibyo. Kini gumikan sa kahaytek na sa pagdiskubre sa mga tambal, ilabi na kadtong mga organic o gikan sa mga tanom. Ang medisina nga hinimo sa laboratory maisip nga sentikong tambal sagad ani may mga sayd epek.
Magpatsek-ap permi sa doctor aron mahiling ang mga tilimad-on sa sakit ug kahatagan tag giya nga di masakit. Magpatambag sab kita sa mga nutrisyonista kun unsay maayong kaunon nga may kompletong mga nutreyens alang sa kahimsog. Maminaw o motambong sa mga health seminars, aron may ideya ka unsa ang angay nga makadisisyon ka’g mas maayo nga haom sa panglawas mo.