Angay bitaw gayud nga hunongon na sa mga tigpropaganda sa mga kandidato ang paghimo’g personal nga pagdaut sa mga kontra sa ilang gilabanan.
Hisguti ninyo ang isyu, ibulgar kun dunay mga dautang binuhatan ang buot magpapili sa katungdanan apan ayaw kanang isyu nga personal.
Pagkadaghang angay nga hisgutan. Gamita ang inyong utok. Ang gipasabot nako mao kining pagsigi’g balik-balik sa mga tigpropaganda sa Team Rama nga si Kongresista Tomas Osmeña nagtangkil-tangkil og “tangke.â€
Dunay mga propagandist sa Team Rama miingon nga nagsaguyod na ang tiil ni Osmeña nga maglakaw timailhan kuno nga siya masakiton. Ang mga tigpropaganda usab ni Osmeña moingon nga “buang†si Rama ug may miingon ‘sab nga nagduda sila nga adis-adis ang mayor.
Kabahin ra kini sa mga personal na kaayo nga atake nga dili gayud maayo. Sa akong giingon pangita mo’g isyu nga may kalabotan ang publiko.
Wala man malilong sa katawhan nga gioperahan si Osmeña sa cancer ug gikuha ang iyang “urinary bladder†kon pundohanan sa ihi kay mao may naigo sa cancer. Kini ang rason nga gibutangan siya og “improvised urinary bladder.â€
Klaro man kaayo nga abtik si Osmeña ug wala magsaguyod sa iyang paglakaw. Kun gusto ninyo nga dauton si Tommy pangita’g isyu nga dili personal pananglit bati ang pagdumala niya sa dakbayan kaniadto.
Pananglit nagduda kamo nga si Tommy nangilkil sa kagamhanan iprobar kay kun makaprobar mo niana, usa kana ka nindot nga isyu.
Unya, kamong mga tigpropaganda ni Osmeña, ayaw na pag-ingon nga buang si Rama abi kay gitugot sa hukmanan nga magbuwag sila ug ang asawa ni Rama kaniadto tungod sa giingong “psychological incapacity.â€
Wala man moingon ang hukmanan nga ang tawo nga adunay psychological incapacity usa na ka buang. Ang termino nga psychological incapacity, nagpasabut nga si Rama wala lang makatuman sa iyang “marital obligation†isip usa ka bana.
Ayaw ninyo lubaga ang isyu nga abi kay dunay pulong “psychological†buang na ang tawo. Porbida sab mo uy. Basi gud sa New Family Code, ang termino nga psychological incapacity nagpasabot nga ang usa ka tawo wala makatuman sa iyang obligasyon, isip bana o asawa.
Ang termino nga psychological incapacity maoy labing giabosahan nga termino diha sa New Family Code aron nga magkabuwag ang magtiayon. Suheto ko niini kay dihang nadistino ko sa hukmanan ako kini nga gihimoan og research.
Maayo unta og mag-usab na kamo sa inyong pagdumala sa inyong mga programa sa radyo mga tigpropaganda sa masi’g ka grupo ilabi na nga pipila na lang ka adlaw ang nahabilin ug eleksyon na.