Black Propaganda

Salawayon ang gihimo sa ubang kandidato o kaha sa ilang tig-propaganda nga aron lang g’yud mosaka ang ilang “ratings” mohimo sila og paagi nga madaut ang kauban nila nga kandidato.

May report man gud nga si Senador Loren Legarda nga numero uno karon sa survey pagka senador, gitinguha nga dauton ang iyang dungog sa kampo ni Senador Allan Peter Cayetano.

Si Cayetano man gud maoy ikaduha nga labing sikat sa ratings mao nga siya ang gidudahan nga nagpasiugda sa pagdaut ni Loren. Sigurado ko nga dili makabentaha si Cayetano kang Loren uy.

Una, mas ilado si Loren kay kang Cayetano nga naila lang ang ngalan sa publiko tungod sa namatay niya nga amahan, apan si Loren ilado na kaayo dihang nahimo siya nga TV newscaster.

Kapin sa 20 ka tuig na ang nakalabay nga una nako nga nahimamat si Loren, dili pa siya senador kaniadto, dihang nahimo namo siya nga guest speaker atul sa seminar nga may kalabotan sa drugas.

Kanang maminaw ko ni Loren nga manubag atul sa interview, ilabi na sa DYLA nga paspas kaayo ang mga pangutana, maila gayud nimo nga angayan siya nga tugyanan og taas nga katungdanan sa kagamhanan.

* * *

Gidayeg ‘sab nako si Senador Francis “Chiz” Escudero kay matud niya nga bisan og mius-os og gamay ang iyang “ratings” malipay ra gihapon siya ug dili mahiubos sa naghimo sa survey.

Dili man g’yud hinoon hambugero kini si Chiz kay dihang nag-number 2 bitaw siya sa survey wala man g’yud niya kini ipasigarbo pag-ayo. Bitaw, husto si Chiz nga ang mahinungdanon nga modaug lang.

* * *

Unya mitumaw na karon ang mga black propaganda. Grabe na kuno kaayo ang pagka masakiton ni Kongresista Tomas Osmeña ug magsaguyod na kun molakaw.

Pastilan subra na ‘sab kana nga pagdaut kay abtik kaayo si Tommy. Pareho ra kana sa gipakatap nga tabi-tabi nga yabag og pangisip si Mayor Michael Rama nga dili usab tinuod.

Ang tinuod, katapusan nako nga nakit-an si Tommy atul sa among press conference kaniadtong Biyernes ug nakita nako nga normal kaayo ang iyang kondisyon basi sa iyang physical appearance. Ang giingong nagsaguyod si Tommy nga naglakaw, dili g’yud tinuod. Si Mayor Rama dili usab “buang” sigun sa gipatoo sa uban nga supporters sa kontra sa mayor.

Bisan og si Mayor Rama kanunay lang nga molihay ug dili kaayo direkta nga mohatag og tubag sa pangutana sa mga reporters, apan dili usab tukma kun ingnon nga si Rama usa ka buang.

Kampanya lang unta mo nga dili mohimo’g black propaganda.