Hustisya maoy singgit sa pamilya ni Mario Alfie Ducayag, usa ka batan-ong amahan nga giingong namatay sa kulata sa mga gwardiya sa usa ka department store diha sa downtown area human gipasanginlang nangawat og sandals.
Sa iyang pagtaliwan gibilin ni Ducayag ang duha niya ka mga anak nga nagpangidaron pa og 3 anyos ang kamagwangan ug usa ka tuig ang kamanghoran.
Ang kamanghorang anak niini nagtuo intawon nga natulog lang ang iyang amahan matag higayon nga sud-ongon niini ang naghigda niyang amahan sulod sa lungon. Samtang ang kamagwangan wala pa masayod unsay hinungdan sa kamatayon sa ilang amahan.
Ang 23 anyos nga si Ducayag, usa lang ka high school graduate apan tungod sa iyang tinguha nga mahatagan og maayong kaugmaon ang iyang duha ka mga anak mikuha siya og vocational course sa TESDA uban ang panghinaot nga makatrabaho gawas sa nasud ug makab-ot ang iyang damgo alang sa iyang pamilya.
Apan nahugno ang maong damgo niadtong Abril 12 dihang si Ducayag misulod sa Metro Gaisano diha sa dalan Colon aron pagpalit og gatas alang sa iyang mga anak. Kini human siya gipasanginlan sa mga gwardiya nga nangawat og parisan sa sandals.
Ang biktima gidala sa mga gwardiya sulod sa ilang buhatan alang sa imbistigasyon apan makalilisang ang sunod nga panghitabo. Gigawas si Ducayag sa opisina nga wala nay panimuot ug gihatud sa tambalanan diin siya gideklarar nga patay na.
Matud sa mga gwardiya nga kalit lang natumba ug mikirig ang biktima samtang ilang giimbistigar. Ang pamilya sa biktima nahibulong tungod kay dili kini patulon.
Ang resulta sa autopsy managlahi. Ang PNP Crime Laboratory miingon way foul play ang kamatayon, apan ang resulta sa autopsy nga gihimo sa National Bureau of Investigation nagpakita nga gituok ang biktima.
Ang labing awahing kasayuran nga akong nahipos mao nga miangkon na ang mga gwardiya atubangan sa homicide section sa Cebu City Police Office. Ambot unsay klase nga pag-angkon, apan ang labing tataw nga namatay sa bun-og ang biktima basi sa mga labod diha sa iyang lawas.
Ang nahitabo ni Ducayag leksiyon ni sa mga tagdumala og dagkong tindahan. Ayaw pasagdi ang inyong mga gwardiya nga mohimo sa trabaho sa kapolisan.
Kun tinuod nga nadakpan ang biktima nga nangawat og sandals nganong ang mga gwardiya man maoy niimbistigar? Ang angayan nilang gihimo mao ang paghipos sa ebidensiya ug gidala sa presinto sa kapolisan ang ilang dinakpan.
Ang kapolisan na maoy angayang niimbistigar niini basi sa reklamo sa tindahan ug ang mga gwardiya nga nidakop isip mga saksi.
Way katungod ang mga gwardiya nga mo dagmal ni bisan kinsa nga ilang masakpan nga nanghilabot tungod kay una lugar dili man sila maoy tag-iya sa butang kinawat. Igo man lang silang giswelduhan sa tindahan.
Angayang mataral sa hukmanan ang mga gwardiya nga responsabli sa kamatayon ni Ducayag. Ug hinaut kapanaminan sa ubang mga gwardiya ang hitabo.
* * *