Unsa man kining report nga miabot nako nga duna kuno’y tinonto sa pipila ka tawo diha sa Land Transportation Office (LTO) sa dakbayan sa Danao? Angay nga tagdon dayon kini sa hepe nga si Eddie Mata.
Matud sa mihatag kanako og inpormasyon nga kadtong mo-take og examination para sa mokuha og lisensya pangayoan og tag P50 sa duha ka tawo nga walay resibo.
Ang informer wala mobayad, wala man ‘sab hinoon mopugos apan dugay kaayo nga gihatag kaniya ang iyang lisensya, siya’y katapusan nga gihatagan.
Sir Ed, ang inpormer mitug-an nako nga giingnan kuno siya sa examiner nga ipaduol kadtong duha ka tawo sa gawas sa opisina’s LTO. Pagduol niya, gipangayoan siya’g P50.
Kahayahay gud aning mga tawhana sir Ed? Kun tinuod man gani nga wala kay labot aning binuang sa imong sakup, hunonga kini dayon.
Awhag nako sa mga molukat og lisensya diha sa Danao LTO ug sa ubang LTO branches, ireport dayon kun dunay binuang nga inyong mabantayan.
* * *
Nagsugod na ako pagsuroy sa mga pulong-pulong sa lainlaing kandidato matag gabii aron maminaw kun unsa’y ilang mga plano nga himoon kun mapili sila sa katungdanan.
Pinaagi gud sa pagsuroy ug pagpaminaw sa ilang mga pulong-pulong makakuha ang reporter og kredible nga inpormasyon kun kinsa sa mga kandidato ang inilog sa mga botante.
Buyno, dili lang nako ibutyag ang akong naobserbahan kay basin og magbagutbot kadtong ubang kandidato.
* * *
Kadaghan na ko nakadawat og reklamo sa kahugaw na dapit sa Barangay Hall sa Santo Niño diha sa dalan Legaspi. Gihimo na man gud na nga pinuy-anan sa ubang naninda diha.
Nasayud ko nga ang kapitan walay mahimo niana kay mahadlok man kana nga dili na makadaug sa eleksyon sa barangay. Awhagon na lang nako si Raquel Arce, hepe sa Prevention Restoration Order and Beautification Enhancement (PROBE) nga maoy moaksyon ani.
Palihug Ma’am Raquel, hapsaya ang gubot ug limpyoha ang hugaw. Nakabantay bitaw ko nga gubot na kaayo dihang dapita. Ma’am Raquel, palihug og atiman sa reklamo.
* * *
Kadtong senior citizen sa Mandaue City nga dia nagparehestro ‘sab sa dakbayan sa Sugbo, nakonpirmar g’yud nako. Dia siya marehestro sa Busay. Sagdi lang, anam-anamon lang nako ang pagbutyag sa inpormasyon kay gi-follow up pa nako.
Ayaw ‘sab tawon mo pag-abuso uy. Gabaan baya mo. Kini gud nga senior citizen, igsoon man diay ni og opisyal sa mga senior citizen sa dakbayan sa Sugbo mao nga natabangan nga bisan tua sa Mandaue, nakaparehestro ‘sab dinhi sa dakbayan.