Maayong adlaw sa tanang suki sa Banat News, adlaw karong Domingo ug special kining maong adlaw alang kanako kay birthday sa akong kanhi boyfriend nga karon ako nang bana nga mao si Euly Flores, busa tugoti ko nga mo-greet og happy birthday sa akong loving ug ever supportive nga bana ug sa tanang nag-birthday karon happy birthday.
Usa ka suwat ang gipadala ngari kanako gikan sa usa ka suki sa Banat News nga si Vic ug ang iyang pangutana maoy akong tubagon karon sa akong column.
Dear Atty. Divine,
Ang akong pangutana Attorney may kalabutan sa akong trabaho. Dugay na ako nga nagtrabaho sa usa ka pribadong kompaniya ug miabot ang panahon nga usa na ako ka Senior Citizen. Gusto na unta ko nga mopahuway ug mohunong sa pagtrabaho ug naglibog ko kun unsa may akong i-file retirement ba or resignation letter? Hinaut nga imo kong magiyahan sa akong problema. —Vic
* * *
Dear Vic,
Kinahanglan ang imong i-file mao ang retirement, ayaw ang resignation letter kay wa kay madawat niana nga benepisyo. Basi sa atong Labor Code sa Article 287 kini nagkanayon nga kun ang usa ka empleyado mag-edad na og 60 anyos pataas mamahimo na siya nga moritero sa iyang trabaho kun siya nakatrabaho na sud sa dili mominus lima ka tuig sa maong kompaniya. Ang retirement benefits nga madawat sa empleyado magdepende kini sa collective bargaining agreement, kontrata o retirement plan sa maong kompaniya. Apan kun pananglitan way retirement plan o agreement ang kompaniya ang atong balaod nagkanayon nga ang empleyado nga more-tire entitled sa retirement pay nga equivalent to at least one-half (1/2) month salary per year of service plus 1/12 for the 13th month pay ug cash equivalent of not more that 5 days of service incentive leave. Ang maayo nimong buhaton karon mao ang pagpahibawo sa imong kompaniya labot sa imong pagritero ug imong ipa-compute ang imong madawat nga retirement pay. Hinaut nga akong natubag ang imong pangutana. Daghang Salamat. — Atty. Divine
Alang sa inyong pangutana, ipadala lang sa Legal Corner sa Banat News or email sa flores_divina@yahoo.com ug akong tubagon ang inyong pangutana matag adlaw’ng Miyerkules ug Domingo.