Sulod sa unom ka mga katuigan og pagtambong og haya alang ug paghalad og Santos nga Misa alang sa mga Nangamatay, nakapamalandong ako sa laing mga posibilidad diin ako makahatag og laing serbisyo kanila gawas sa Santos nga Misa. Ug kini ang posibilidad sa " Counselling Sessions" ug Recollections uban sa mga hingtungdan. Kini ang nakahatag kanako og kaikag nga tagikon ug igambalay ang modyul alang ning maong katuyuan.Akong pasalamat kang John Anthony OFM. Cap., nga diha sa iyang kasinatian ingon nga counselor ang nisulat og mga libro kalabot niini. Atong gibase ang atong pagtuon sa iyang libro: Types of Counselling: A Life-Span Developmental and Situational Approach. Hinoun ato pud nga pagakonsultahon ang uban pang mga libro sa sikolohiya ug uban pang mga basahon kalabot ning mga butanga. Busa ubani ako ninyo ning panaw ug pamalandong mahitungod sa kinabuhi ug sa kamatayon.
Tawhanong kalambigitan
Ang tawo magpakabuhi diha sa akto sa pakiglambigit. Nga sa ato pa, nagkinahanglan gyud kita sa usa’g-usa kanato. Dili kita mabuhi sa kinaugalingon lamang. Mao nga ang PAGBANGOTAN gumikan sa KAMATAYON sa mahal sa kinabuhi ang nagasukad gayud ning duha ka mga pulong: KADUGTUNGAN ( attachment ) sa usa’g-usa ug ang PANAGBULAG ( separation). Kun maghisgot kita’g dugtong o sumpay, nagpasabot kini nga mahinungdanon kaayo ang nahimong sumpay o dugtong sa atong kinabuhi. Sama pananglit sa kalambigitan sa usa ka bana ngadto sa iyahang asawa mao tingali nga ang maong bana maoy nag-abaga sa mga panginahanglang materyal sa pamilya, nahimo siyang kusog ug simbolo sa kalig-on ngadto sa iyang asawa nga nagsalog kaniya. Ang maong han-ay, maoy nakapahimo sa asawa nga maanad sa presensiya sa bana. Ug kun moabot na man gani ang PANAGBULAG (separation ) labina sa paagi nga wala damha (sama pananglit sa kamatayon gumikan sa aksidente) ang makapahimo sa asawa nga dili makadawat gumikan sa maong panghitabo. Ang wala damhang panagbulag ang makapatay-og sa sikolohikal, emosyonal, ug espirituwal nga kahimtang sa asawa nga moresulta og pagbangotan ug hilabihang kaguol.
Nahimo nang kabahin sa sistemang tawhanon sukad pa sa atong pagkahimugso, ang kamatuoran sa KADUGTUNGAN ingon man ang PANAGBULAG. Ang bisan kinsang tawo, o butang nga mahinungdanon nga anaa kanato ug gimahal nato pag-ayo nga mawala o daw gisakmit gikan kanato ang makahatag gyud kanato og sakit halos sa kinatibuk-ang aspeto sa atong pagkatawo.