Giawhag ni magpapatigayon Glenn Soco, kandidato sa pagka bise gobernador sa lalawigan sa Sugbo ang Commission on Election sa pagmando kang acting governor Agnes Magpale sa paghunong lamang una sa Suroy-suroy sa Sugbo nga ipahigayon karong Abril 27-29 didto sa isla sa Camotes aron dili kini magamit sa politika. Gusto ni Soco nga unya na lamang tapos sa piniliay ipadayon ang suroy-suroy aron dili kini maabusohan sa kasamtangang liderato sa lalawigan sa Sugbo. Si magpapatigayon Glenn Soco ug acting Governor Agnes Magpale nag- atbang sa pagpapili sa pagka bise gobernador sa lalawigan sa Sugbo.
May punto si Glenn Soco sa iyang awhag sa Commission on Election sa pagpahunong sa Suroy-suroy sa Sugbo nga gipasiugdahan ni acting governor Agnes Magpale. Sa sinugdanan pa lang gigamit na sa politika ang nahisgotang kalihokan busa dili lamang posibling gamiton sa politika ang suroy-suroy kun dili pamolitika gayod kini. Ang Suroy-suroy sa Sugbo pamintaha busa angay ug matarong lamang gayod nga dili kini ipadayon kana kun gusto man ni acting Governor Agnes Magpale ang patas nga labanan sa pagka bise gobernador sa lalawigan sa Sugbo.
Kun patas ang bise gobernadora sa iyang mga kaatbang sa politika dili na siya magpasulti pa sa Commission on Election, siya na mismo ang mopahunong sa suroy-suroy.
* * *
Wala madayon ang session sa junta provincial sa lalawigan sa Sugbo kaniadtong Lunes tungod sa kakuwang sa gidaghanon sa mga nanambong sa ilang session. Sigun sa atong nahibaw-an sila lang si bokal Teddy Ouano ug Arleigh Sitoy ang mitambong sa session. Ang ubang sa sakop sa junta nalinga na sa ilang pagpangampanya.
Angayang hinumdoman sa mga sakop sa Junta Provincial nga nagpasubli pagpapili nga wala pa mahuman ang ilang termino busa dili pa sila angayan nga mamahuway sa ilang trabaho. Kining ubang kandidato sa pagka bokal mga bintahoso. Dili man mo manundog nila ni Teddy Ouano ug Arleigh Sitoy nga bisan tingkampanya motunga gyod sa ilang trabaho.
* * *
Sa unang semana ning buwana mipauli ko kuyog sa akong pamilya sa among lalawigan sa Bohol ug didto akong nahibaw-an nga init na usab ang politika. Didto ako usab nga nahibaw-an nagsugod na ang pinalitay. Sa among lungsod sa Bien Unido mibisita ang kandidato sa pagka gobernador nga ginganlan og Cheche. Sa iyang pagbisita lipay kaayo ang mga taga amo tungod kay bisan og layo pa adlaw sa piniliay nanghatag na siya og tag 200 pesos sa kada tawo nga nanambong. Gawas sa 200 pesos nanghatag pa gyod siya og sabon.
Daghan diay og kwarta ang maong kandidato pagka gobernador sa lalawigan sa Bohol kay bisan layo pa ang piniliay namalit naman siya og boto. Ang kwarta nga iyang gipamalit og boto didto sa Bohol dili kaha ni gikan sa mga drug lords?
Si Cheche, mayor sa lungsod sa Carmen, Bohol. Ang Carmen usa sa giila sa Philippine Drug Enforcement Agency nga naghitak ang drugas. Wala kaha ning maong kandidato suportahi sa nagpadagan og drugas sa iyang lungsod ilabi na nga wala siya makasumpo sa suliran sa drugas sa iyang lungsod? Nangutana lang.