Puwerting bug-ata sa pagdumot sa mga pari batok sa mga senador ug mga kongresista nga mipalig-on sa RH Law o balaod bahin sa reproductive health.
Kay matud pa sa mga kaparian nga pulboson nila pinaagi sa Catholic vote ang maong mga magbabalaod nga magpapili karong Mayo 13.
Kompleto na sila og listahan sa tanang mga kandidato nga gibaharan nilang pakamangon ug di botohan sa tanang mga Katoliko sa Mayo 13.
Gitawag nila nga sakop sa Team Patay ang maong mga kandidato ug ang mga ngan niini gikan sa senador ug mga kongresista andam na nga ewali ug ebandilyo sa mga pari sa panahon sa ilang misa.
Anhi nila ipakita ang ka gamhanan sa mga pari pagpitol sa mga Katoliko aron mosunod sa ilang mandar ug makighiusa sa ilang hukom
Ambot bitaw, kun nagtuo ang mga magbabalaod nga mipanday ug mibotar aron mahimong balaod ang RH Bill nga kini makaayo sa kabus nga magtiayon ug sa kabus nga mga asawa, basin sayop ang ilang panglantaw kay sa mentalidad sa mga pari.
Kay alang sa mga kaparian nga gipangunahan sa Catholic Bishops Conference of the Philippines (CBCP) maot, di maki-Dios ug makapaalaot sa magtiayon ang maong balaod.
Sa ilang panagsumpaki og katarungan di angay nga sutaon kinsay bright kanila, apan usa lang ang angayang hatagan og pagtagad sa mga kaantigo maniid.
Sa Biblia, gitudlo ni Cristo sa mga tawong tinuod nga mosunod sa Iyang mga sugo ug moalagad Kaniya ug sa Dios, nga maghiusa sa tanang dagkong kalihokan niini nga may labot sa pag-alagad ug ilabi na sa pagpakanaog og desisyon sama sa pagpili og kandidato sa panahon sa election.
Sa Biblia gitudlo nga ang mga tinuod nga alagad ni Cristo ug sa Dios di angay magbahin-bahin o mag-iya-iya pagtuman sa ilang gusto ilabi na sa pagpili og kandidato nga iboto.
Busa karong Mayo 13 anhi ipakita sa tanang kaparian nga ang tanang Katoliko kahiusa nila sa pagboto sa mga kandidato nga sakop sa Team Buhay ug pagpakamang sa mga kandidato sa Team Patay pagpakita nga tinuod silang mituman sa sugo ni Cristo ug sa Dios.