Ang tubig

Tungod sa atong lindog, midapit kanato ang tagdumala sa kompaniya nga  MYBEEWAY nga gipanag-iya sa nabantog nang ALDRZT management nationwide sa Bacolod City. May moderno silang buhatan sa mga produkto alang sa pagmintinar sa kahimsog sa panglawas.  Makita nato kini sa udto sa TV-5, sa programa ni Willy Revillame, ang Wowewee. Usa sila sa mi-sponsor niini.

Unang semana sa Septiyembre 2012, wa ko magdahom nga gisuroy ko nila, sa ka halapad sa ilang propertidad sa dakbayan, sa patag ug mga kabukiran nga gipanamnan og nagkalainlaing mga herbal nga tanom o punoan sa kahoy. Para kanako, usa kini sa matawag nato nga"  HERBAL PARADISE”  sa atong nasud.

Wa gyud ko malimot dihang mihapit mi sa ilang sikat nga destinasyon sa mga turista nga mao ang Mambukal Mountain Resort. Didto may makita kang tubod sa tubig nagbukal nga may asupre. Ang itlog nga itugsaw mo maluto gyud. Unya, may lapad pud nga lawa sa tubig, mainit sad nga dunay lingaw kaayong nag-“boating.”Sa agianan niini, may inalisngaw sa asong init gikan sa liking bato.

Birhen kaayo ang kinaiyahan sa dagkong bukid, diin may pito ka ang-ang sa busagak sa tubig o waterfalls nga gikan sa nag-awas nga dakong tuburan sa itaas. Delikado madakin-as ka kun motungas ka diin sa kilid may mga tubig nanidlit morag gripo gikan sa batong bukid. Nakaabot ko didto sa kinatas-an, hapit duha ka oras. Mga batan-on kong kauban, wa ka sugakod mihangak.

Unsaon tubig binotelya man ang giinom, dili man kadtong tubig nga dalisay direkta gikan sa tuburan sa kinaiyahan. Nga ig-inom nimo mawa ang ka kapoy ug ka kutas, nga mopabalik dayon sa kaabtik sa kusog sa imong paglihok. Ania dinhi ang tubig nga tugob sa original nga sangkap sa nutrisyon sa atong kahimsog.