Pastilang kuyawa niini, kun tinuod kini kaanugon baya sa katigayonan sa usa ka financier nga mahiadto na unya sa mga kamot ni kumpare.
Ang nindot kaayong bay, nindot kaayong sakyanan, nindot kaayong misis, ug ang abundang kuwarta, pastilan hayahaya sa makapanag-iya niining tanan.
Mao diay tong giingon nga may bay sa usa ka financier sa masiao nga girakrakan ang gate sa mga vigilantes, unya niining bag-o gibanhigan gyud ug nangabuslot sa bala ang nindot kaayong sakyanan ug hasta ang lawas ug nawong sa gidudahang financier usab sa masiao naigo pa sa mga bala.
Sakita baya niini, kinsa kahay isunod no? Aw kun tinuod kining hitaboa angay na nga magsul-ob og bullet proof vest ang mga hingtungdan, bisan gikan lang sa paa paingon sa ulo lakip na ang dagway.
Kini aron nga kun pauwanan man og mga bala, aw manuasik lang ang maong mga bala nga di makadut sa patyanan sa tawo nga maigo niini.
Di baya malalim ang pagpadaghan sa kuwarta sa illegal nga paagi kay mao na sa ginhawa ang pagtago-tago niini ug halos anaa kanunay sa kulbahinam ang kinabuhi sa hingtungdan.
Kanang mag-inusara ka unya magsud-ong sa harianon nimong kahimtang gumikan sa kadaghan nimong kuwarta nga tanan nimong panginahanglan sa pagpatahom sa imong balay sayon ra kaayong nahimo, unya maghunahuna ka nga sa kalit imo lang biyaan gumikan sa nagsunod-sunod ug nagpaniid kanimong mga vigilantes, aguroy, kamingaw baya nga imaginon.
Unya gawas niini mosil-ing ka sa imong awto ug uban pang mga sakyanan nga nindot kaayong sakay-sakayan, apan labaw sa tanan kun ma-imagine nimo ang guwapa ug matahom kaayo nimong misis nga sa kaulahian lain na unya ang kadug sa imong katre nga imong gihagoan pag-ayo sa pagpamalit pinaagi sa ilegal nimong kinitaan, ambot di ba kaha ka mag-alindasay nga lisud kaayong ikatug aron kalimtan ang tanan. Unya ngano man sab kining mga vigilantes nga mga financier ra man sa illegal nga sugal ang ilang buot patyon? Ang mga nagpadagan diay o supplier sa gidiling drugas, exempted diay?
Ah di na kini maayo, may pinalabi diay kining mga vigilantesa, busa angay mag-rally ang mga financier sa illegal nga sugal kun ingon niini ang kinaiya sa maong mga vigilantes, aron mangayo og kaangayan puslan man.