Mausab pa kaha ang Simbahan?

Atubangan sa kabalaka nga mas gamhanan ang gikaintapang burukrasya sa Vatican kay sa tinguha pagpadayon sa yano nga pagpuyo nga napasundayag sa iyang pagduma sa Artsidyosesis sa Buenos Aires, si Pope Francis nipatuman sa mosunod nga kausaban sa unang adlaw sa iyang pamunoan:

“ Inay mosakay sa papal limousine, niipon sa bus sa mga kardinal pagpauli sa ilang apartments human sa conclave ug nipili sa mas yanong sakyanan kay sa Mercedes nga dunay papal plate SCV1; ug

“ Padayong gisul-ob ang pastoral cross sa iya pang pagka obispo inay ang bulawan nga pectoral cross ibabaw sa puwa nga mozzeta o kapa.

* * *

Usa sa labing unang mabati sa bag-ong mga Santo Papa mao ang panginahanglan sa pagsunod sa mga ritwal ug mga tradisyon sa Simbahang Katoliko nga nahimong mas gamhanan kay napatuman nga bisan gamay’ng lama sa kausaban sud sa kaliboan na ka katuigan. Apan daghang timaan nga wa mahudlat si Pope Francis sa burukrasya:

“ Wa motungtong sa entablado sa Sistine Chapel human napili sa conclave, nagpabilin sa sawog uban sa mga kardinal ug nagbarog, inay molingkod sa trono nga maoy gihimo sa nangaging mga Santo Papa; ug

“ Sa wa pa mobendisyon sa katawhan siya ang nangayo sa bendisyon sa kaliboan nga nagpunsisok sa St. Peter's Square.

* * *

Ang kalitkalit nga mga lakaw ni Pope Francis gawas sa Vatican nagsugod na paghatag og labad sa ulo sa seguridad. Nakapahinumdom ni sa kadagkoan sa Vatican ni anhing Pope John Paul II nga ganahang mosimang sa mga dapit nga di angay’ng adtoan. Si Pope Francis kaduha na mogawas sa Vatican nga wa mahan-ay:

“ Niduaw siya sa Basilica sa Saint Mary Major nga nakapabara sa trapiko sa kinapusoran sa Roma; ug

“ Nihapit siya sa hotel nga gipanag-iya sa simbahan nga iyang gipuy-an sa wa pay conclave aron pagkuha sa nahibilin niyang mga bagahe ug pagbayad sa abangan.

* * *

Si Pope Francis wa gyud makalingkod sa Roman Curia, ang gabinete sa Santo Papa. Maong giisip nga outsider ug maong wa maduhig sa mga eskandalo sa Vatican. Apan ang kakuwang og kasinatian sa burukrasya gikahadlokan nga makababag sa iyang gitinguha nga mas makahuloganon ug malungtarong kausaban sa simbahan.

Pahinumdom nga di tanang haligi sa simbahan ang nahinangop sa iyang pagkapili: Ang Italy Bishops' Conference ni-email sa reporters sa ilang pahalipay sa ilang kauban nga si Kardinal Angelo Scola sa Milan sa iyang pagkapili. Ang problema mao nga di si Scola ang napili ug nadawat sa media ang email napu ka gutlo human nakaluwat si Pope Francis sa iyang mensahe sa balkon sa St. Peter's Basilica. Human sa tunga sa oras, gibakwi sa mga obispo ang sayop pinaagi sa laing email nga nipahalipay ni Kardinal Mario Bergoglio.

* * *

Email: [email protected]