Nadiskubrehan sa mga opisyal sa city treasurer's office sa dakbayan sa Sugbo ang operasyon sa usa ka Internet Cafe sulod sa city condominium.
Ang maong Internet Cafe gawas nga way business permit migamit sa property sa gobyerno nga way abang libre pa gyud sa kuryente.
Matud sa report ni Rene Borromeo nga ang maong Internet Cafe negosyo ni Kapitan Dante Tabucal sa Sudlon nga maoy gitugyanan ni Mayor Michael Rama sa pagdumala sa city condominium. Way problema og nagnegosyo si Tabucal diha sa condomium kun wala niya pahimusli ang iyang pwesto.
Ang nakadaot kay wala lang niya pahimusli ang iyang pwesto iya pang giluto sa kaugalingon nga mantika ang gobyerno.
Laliman ka bay siya maoy niginansiya sa negosyo nga ang gobyerno maoy naggasto sa kuryente.
Usa ni ka dako nga pagpangurakot sa kwarta sa mga magbubuhis. Busa kay usa man ka krimin nagpaabot unta ko og tukma nga aksiyon gikan sa pamunoan sa dakbayan.
Apan inay imbistigahon ang tataw nga pagpangawkaw sa salapi sa gobyerno daw sa mipakita man hinuon og paglaban si Rama.
Sa report gihapon ni Renbor iyang gikutlo si Rama nga nanalipod sa operasyon sa Internet Cafe sa iyang kaalyado sa politika.
Matud ni Rama nga maayo nga dunay Internet Cafe sulod sa condominum tungod kay aron dili na kinahanglan moadto pa sa gawas ang mga tinun-an nga nagpuyo dinhi kun gikinahanglan sila nga mogamit og Internet.
Ang city condominium gigamit man gud karon nga pinuy-anan sa mga estudyante gikan sa mga bukiran nga barangay sa dakbayan.
Husto ang giingon ni Rama nga maayo nga dunay Internet Cafe sulod sa condominium kun kini legal nga nag-operate.
Apan ang nakadaot kay illegal ang operasyon ni Tabucal tungod kay wala kini'y business permit.
Buot ba nga ipasabot ni Rama nga exempted si Tabucal sa rekisitos pagpadagan og negosyo dinhi sa dakbayan tungod kay kaalyado niya kini sa politika?
Sunod nako nga pangutana, pila may abang ni Tabucal sa dakbayan sa luna nga iyang gigamit sa pag-operate og Internet Cafe?
Kinsa may nagbayad sa kuryente, dili ba ang dakbayan? Wala ba ni makit-i ang maong mga punto sa mayor? O iyang gituyo pagpiyong iyang mga mata tungod sa politika?
Hain naman ang gipunay niya og pasiatab nga tul-iron ang hiwi kun inay disiplinahon ang mga sakop niyang mapahimuslanon iya na hinuong duphan. Nagpaabot ko nga taktakon ni Rama si Tabucal sa pwesto ug pabayron sa iyang paggamit sa condominium sa pribado niyang negosyo ug ingon man sa kuryente.
Hinaot nga transparent si Rama sa himuon unya nga imbistigasyon batok ni Tabucal ug dili mahisama sa ubang mga kawani sa City Hall nga bisan og nasakpang tiggamitan og illegal nga drugas gipasagdan lang nga mopadayon sa trabaho.
* * *