Kun ang imong katungod mao nay malapas
Kitang tanan adunay katungod sa paghimo sa butang nga gusto natong buhaton. Ang atong batakang balaud mismo naglatid sa atong mga katungod basi sa Article III kon Bill of Rights sa atong Constitution. Apan kun ang imong katungod mao nay malapas sa ubang tawo, unsay angayan nimong buhaton? Kana nga pangutana ang atong tugabon karon.
* * *
Dear Atty. Divine,
Naa ko nagpuyo sa usa ka townhouse. Ang akong problema mao ang among silingan nga magsige lang og videoke halos kada gabii kay anaa man gud siyay tindahan nga namaligya og ilimnon, ang akong mga anak nangreklamo na kay disturbo kaayo panahon sa kagabhion ilabi na kun sila magtuon. Amo na ni sila nga gibadlong apan wa mopatuo kay matud pa niya, iya kining katungod kay naa man sila nagvideoke sa sulod sa ilang balay. Unsa may maayo namong buhaton? — Lina
* * *
Dear Lina,
Way lalis nga ang imong silingan adunay katungod sa bisan unsa niyang buhaton sa sulod sa iyang panimalay kay siya may tag-iya niana apan ang atong pag-exercise sa atong katungod aduna kanay limitasyon ug dili kana absolute. Kun ikaw nakaapekto na sa katungod sa ubang tawo o sa imong mga silingan tungod sa ka saba sa imong pag-videoke ug nakadisturbo na kaayo sa ubang tawo, makonsiderar kana nga nuisance ubos sa Article 694 sa atong Civil Code. Ang maayo nimong buhaton karon mao ang pagpadangat og pormal nga reklamo ngadto sa inyong homeowners association kun aduna man gani, lain nimong option mao ang pagpasaka og reklamo sa inyong barangay aron mapatawag ang inyong silingan nga nag-videoke matag gabii ug aron usab kamo mahusay. Kun pananglitan dili gyud mopatuo sa barangay ang inyong silingan, mamahimo nimo siyang pasakaan og kasong civil aron mahunong na kining iyang gibuhat ug mamahimo sab ka nga mangayo og damages tungod sa iyang gihimong pagdisturbo kaninyo. Hinaut nga akong natubag ang imong pangutana.
— Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.
- Latest
