Ugmang adlawa mag-ilis og liderato ang buhatan sa Bureau of Customs sa Port of Cebu. Ang pag ilis sa liderato ilang giatol sa ika 111 ka tuig na nga anibersaryo sa nahisgutang buhatan. Sigun sa akong nahibaw-an ug gani murag nahimo nang praktis sa maong buhatan mao ang pagbalhin sa mga tawo niini sama sa mga district collector sa mga port nga wala makakolekta sa gisita nga target collection. Pero kini karon lahi tungod kay bisan og nakakuha sa iyang target collection ug gani milapas pa si collector Ronnie Silvestre sa iyang collection sa Port of Cebu gibalhin siya samtang ang mga wala makakuha sa ilang target collection gipabilin sa ilang distrito. Ngano ug unsa may hinungdan? Layo ra ba si Silvestre sa dughan ug kasing-kasing ni Customs Commissioner Rufino Biazon?
Kun tumong ug tuyo ni Customs Commissioner Rufino Biazon ang pagpataas sa collection sa buhatan nga iyang gipangulohan nganong pang ilisan man ang mga tawong maayo og performance ug naka-deliver sa gisita kaniyang target collection? Dili ba ang angay kaniya ipabilin aron motaas pa pagmaayo ang iyang collection? Dili ba mao man kini ang gihimo sa mga nanglabay na nga mga Customs Commissioner hinungdan taas ang ilang nakolektang buhis?
Kining lahi nga patakaran nga gisunod ni Customs Commissioner Rufino Biazon mao ang akong gituohan nga maoy hinungdan kun nganong sa tanang nanglabay nga mga Commissioner sa Customs siya mao ang may pinakaubos nga collection kun dili man pinaka-lousy nga collector.
* * *
Gibandilyo sa kagamhanan ni Pangulong Benigno Simeon C. Aquino III ang paglambo sa ekonomiya sa nasud. Ang paglambo sa ekonomiya sa nasud tinuod ug gani ato kining makita sa dakbayan sa Sugbo diin naglumbaanay sa pagtubo ang mga tag-as nga mga edipisyo. Pero ang paglambo sa ekonomiya natagamtaman ba sa mga kabus? Naharuhay na ba ang kinabuhi natong mga anak sa singot?
Tinuod milambo ug mitubo ang ekonomiya sa nasud apan subo ang iyang paglambo tungod kay wala kini makamugna og trabaho. Ang paglambo sa ekonomiya wala gihapon makapaangat sa kahimtang sa mga kabus tungod kay ang kaayohang dala niini anaa ra sa mga adunahan ug mga dato nagtuyok-tuyok. Ang paglambo sa ekonomiya wala makapataas sa suholan sa mga anak sa singot nga nagtrabaho sa mga among buaya.
Ang ekonomiyang milambo madaugdaugon ug mapahimuslanon tungod kay gipahimuslan pagmaayo niini ang mga anak sa singot nga gibusdakan sa daghang mga gimbuhaton. Ina kay momugna og dugang trabaho ang maayong ekonomiya gipauso hinuon niini ang multi-tasking sa mga anak sa singot ug gihatagan pa gyod og ubos nga suholan. Magpasalamat ba ta sa milambo nga ekonomiya?