Dinhi lang sa Pilipinas

Gibasura sa Sandiganbayan ang kaso nga gipasaka sa Ombudsman batok kang kanhi Lapu-lapu mayor ug karon Kongresista Boy Radaza gumikan sa pagkalambigit niini sa gipaburot nga prisyo sa mga decorative lamppost kaniadtong tuig 2006. Sa pagbasura sa kaso batok sa kongresista ang Sandiganbayan mirason nga walay ebidensiya ang Ombudsman nga gipaburot ang prisyo sa mga decorative lampposts. Gawas niini napakyas usab ang Ombudsman sa paghatag sa mga dokumento sa ilang imbestigasyon ngadto sa mga akusado ug sa Sandiganbayan.

Gihimo usab nga basihanan sa Sandiganbayan sa ilang pagbasura sa kaso batok kang Kongresista Boy Radaza mao ang pag-angkon sa Ombudsman nga gikinahanglan pa nila ang paghimo og dugang pagtoon sa kaso.

Dinhi atong nakita ang pagkakolokoy sa buhatan sa Ombudsman. Dinhi milutaw kun giunsa nila sa pagdali-dali ang pagpasaka  og kaso batok sa mga akusado. Kun nganong ilang gidali-dali ang pagpasaka sa kaso, ang Ombudsman nasayod sa dakong hinungdan. Bisan og dili ug wala motug-an ang Ombudsman sa dakong hinungdan ako nagtoo nga ang ilang pagdali-dali sa pagpasaka og kaso ngadto nila ni Boy Radaza ug mga kaubanan mao ang paglikay ug pagsalimbong sa mga tag-as nga opisyal sa gobiyerno nga mao gayod ang nakasapi ug nakapaburot sa prisyo sa mga lampposts.

Hinumdomi ninyo nga ang proyekto iya sa nasudnong kagamhanan ug kay iya sa nasudnong kagamhanan ang nasudnong ahensiya sa gobyerno ang nagpahigayon sa pagpili kun si kinsa ang maka-supply sa mga lampposts ug mao usab kini ang mibayad. Wala gayoy labot niini ang mga lokal chief executives dinhi sa Sugbo. Kun nakaapil man niini ang mga lokal chief executives, ang ila mao ra gayod ang pagpirma sa program of  works and estimates.

Sa pagpasaka sa kaso, ang Malakanyang niadtong panahona ug ang tuta niining Ombudsman nagkomboya aron himoong sakripisyo ang mga lokal chief executives aron mapanalipdan ang mga bag-angang buaya sa Malakanyang nga nakatukob sa tambok nga proyekto.

Sa mga decorative lampposts nga mibalor og 430 ka milyon ka pesos 360 niini ang gipang-ugbok sa daplin sa kadalanan sa Sugbo nga mikantidad og tag 85 mil ka pesos matag usa. Sa 564 ka mga decorative lampposts nga gipang-ugbok sa kadalanan sa dakbayan sa Mandaue, 300 niini ang nagkantidad og tag 85 mil ka pesos, 124 niini ang nagkantidad og tag 224 mil ka pesos ug 140 niini ang nagkantidad og tag 314,698 - 350,490 ka pesos ang matag usa. Niining maong gidagkoon sa kantidad motoo mo nga wala paburota ang prisyo sa lamp posts? Dinhi lang ni sa Pilipinas.

* * *

Ako diay nga pahalipayan ang Lumad Basakanon sa Barangay Basak San Nicolas ning dakbayan sa Sugbo nga miharos sa primyo sa Sinulog nga gipahigayon didto sa lungsod sa Carmen. Ang Lumad Basakanon nga mipakita sa ilang kalidad isip kampyon misakmit sa kampyonato sa Sinulog sa Carmen. Gawas sa kampyonato ila usab nga gisakmit ang best in costume, best in musicality ug best in street dancing. Lumad Basakanon Congratulations.