Sipa kaayo ang awhag sa taga Caloocan City nga ipahunong na sa mga armado ang pagpaturagas og pabuto sa ilang armas panahon sa Pasko ug sa bag-ong tuig human mamatay sa saag nga bala si Stephanie Nicole Ella usa ka 7 anyos nga tinun-an sa elementary sa maong dakbayan.
Apan bisan sa kalanog niini kay nabaniog man kini sa tibuok nasud pinaagi sa pamantalaan, radio ug telebisyon, tataw kaayo nga ang tanan sama ra sa iro nga nagpaghot sa buwan.
Kay ang pagsumpo sa dinad-anay og armas sa mga tawong maayo ug dautan lisud na nga mabangbang.
Ang mga tawong dautan mao kadtong mga tulisan, hired killer, samtang ang mga giilang tawong tarong mao ang mga otoridad sa kapolisan, sundawo ug uban pang anaa sa ahensya sa goberno.
Apan kun ang pagtangkil og armas de fuego sa mga tawong tarong ug dautan wa masumpo niadtong unang mga panahon sa wa pa moabot ang marijuana, shabu ug uban pang matang sa illegal drugas dinhi sa nasud, ingon man ang mga motorsiklo nga madata-datahan lang, karon pa kaha?
Ang tanan nasayud nga ang shabu maoy silbing gasoline nga itubil sa mga tawong criminal aron labi silang maisog sa pagbakyaw sa ilang kamot sa paggama og krimen.
Gani bisan kadtong di pa criminal, gustong mosalmot sa bisyo nga pagka-durogista aron dali ra silang makahimo og krimen.
Sa pagkadurogista, mag-uban niini ang mga tawong tarong ug mga tawong dautan kansang tuyo mao ang pagpanamastamas sa ilang isigkaingon sa way kukahadlok.
Ug ang labing makapaisog kanila mao ang hinagiban, sama sa kutsilyo apan mas ganahan sila sa armas de fuego kay di kaayo sila hago sa pagpatay og tawo.
Dali ra kaayo silang makakuwarta pinaagi sa pagpanulis, dali ra silang makalugos og babaye ug tanang matang sa krimen nga gusto nilang buhaton mahimo kaayo pinaagi sa sumbihan sa pusil .
Unya ang labing nakapasayon kanila sa pagbuhat og krimen mao ang motorsiklo nga ikaabag nila bisan asa sila gustong mohimo og krimen. Unya moundang pa kaha sila sa pagkupot og armas de fuego?