Akong mga panghinaot nga ning tuig 2013, magmabungahon pa pag-ayo ang atong pagkinabuhi.
Pasamalatan nako akong mga suki ning Tikdol nga sa miaging kapin sa 13 ka tuig, nag-uban kanato pagtikdol sa mga tikdolanan diha sa gobyerno ug sa pagsunod sa mga panghitabo sa lalawigan nga atong gipangtikdolan.
Bulahang Bag-ong Tuig, mga kaigsoonang Pordoy!
* * *
Unsa kahay mahitabo ni Gob. Gwendolyn Garcia karon nga nakalabay na ang pasko ug Bag-ong Tuig?
Puwersahon kaha sa Malacañang paglarot si Gwen gikan sa iyang opisina aron hingpit nang mahatagan og katumanan ang suspension order batok niya?
Kining tanan mag-depende lamang kang acting Gobernador Agnes Magpale.
Si Magpale ang nakaingon nganong hangtod karon, si Gwen nagpabilin gihapon sa iyang buhatan.
Ang mga sakop sa kapolisan sa rehiyon, pinanguluhan ni Heneral Marcelo Garbo, nagpaabot ra gyud sa “marching order” ni Magpale human sa iyang pagpanumpa. Kun gimando pa dayon ni Magpale ang pagpapahawa kang Gwen pinaagi sa puwersa, wala pay Pasko, wala na si Gwen ug iyang pamilya diha sa Office of the Governor.
Pananglit mapapahawa si Gwen sa iyang puwesto, dili kaha siya mag-atubang og laing kaso nianang iyang pagmagahi pagpahawa sa Kapitolyo?
Kanang iyang pagpadayon og puyo sa Office of the Governor nga 24 oras naggamit sa kuryente alang sa suga ug aircon ug sa tubig sa kasilyas, dili ba kaha siya pabayron niini?
Kun wala’y mangahas pagkiha kang Gwen ug sa iyang pamilya nga mi-estar og dugay sa Kapitolyo, moimbestigar kaha ang Ombudsman kanila moto proprio, nga klaro man sa mga footage ug litrato sa media nga nagluklok gihapon sila diha bisan na-serve na ang suspension order?
Kining tanan, mahibaw-an nato kini karong umaabot nga mga adlaw, karon nga milapas na ang panahon sa kaluoy ug pangkamanggihatagon.