Usa ka nangangko'ng nagpakabana nga lumolupyo ning dakbayan ang mipasaka og kaso batok ni konsehal Rodrigo "Bebot" Abellanosa didto sa Ombudsman tungod sa giingon nga pagpahimulos niini sa scholarship program sa City Hall.
Usa ka Philip Banguiran, lumolupyo sa Barangay Inayawan, ang misang-at sa reklamo didto sa buhatan sa Ombudsman Visayas sa miaging semana.
Gihulagway sa reklamo nga gipahimuslan ni Abellanosa ang programa sa gobyerno alang sa iyang personal nga negosyo. Kini human masayri nga kapin sa 50 porsiyento sa mga scholars sa dakbayan atua magtungha sa eskwelahan nga iyang gipanag-iya.
Basi sa reklamo singko mil ( 5,000) sa siete mil (7,000) ka mga City Hall scholars sa school year 2010 ug 2011 atua magtungha sa Asian College of Technology (ACT) nga gipanag-iya ni Abellanosa.
Matag usa ka scholar sa dakbayan nagdawat ni og P10 mil nga tuition fee gikan sa City Hall matag semester. Sa ato pa nga P50 milyones ang gidawat sa tunghaan ni Abellanosa gikan sa City Hall matag semester. Sa usa ka tuig nagpasabot ni nga P100 million ang kita sa tunghaan ni Abellanosa sa scholarship program sa dakbayan.
Gihulagway ni Abellanosa nga pamolitika ang reklamo batok niya. Iyang gipasanginlan ang iyang kaatbang sa politika nga si Atty. Aristotle Batuhan nga maoy nagpaluyo sa pagpasaka og kaso batok niya.
Si Abellanosa ug Batuhan maoy magsangka pagkakongresista sa south district sa moabot nga eleksiyon.
Tinuod mamahimong politically motivated ang pagpasaka og kaso batok ni Abellanosa tungod kay dugay na nagsugod ang City Hall scholarship program ug dugay na sab siyang nagpahimulos niii ni apan nganong karon lang nga nagdanga-danga ang eleksiyon dunay mipasaka og reklamo.
Apan wala ni magpasabot nga tungod kay politika ang motibo sa kaso wala nay angayang tulobagon si Abellanosa. Bisag asa nga anggulo tan-awon tataw ang conflict of interest ni Abellanosa sa maong programa.
Kini tungod kay konsehal siya sa dakbayan sa Sugbo. Si Abellanosa usa sa mga mohatag og pagtugot aron mahatagan og pundo ang mga tunghaan nga dunay scholar sa dakbayan.
Gawas pa sakop siya sa committee on education sa konseho nga maoy nag-supervise sa programa.Busa kinsa may motuo nga wala siya magpahimulos sa programa hinungdan nga mas daghan ang mga scholars nga tua sa iyang eskwelahan kay sa ubang unibersidad ug kolehiyo sa dakbayan.
Imposible man nga tuohan nga mas daghan ang mga buot mo enrol sa iyang tunghaan kun wala niya gamita iyang impluwensiya kaysa mas ilado ug dunay pangalan nga mga tunghaan dinhi sa Sugbo.
Nanghagit si Abellanosa ni Batohan nga maoy personal nga mopasaka sa kaso didto sa Ombudsman. Alang nako dili na importante kinsay misang-at sa reklamo. Ang importante mao ang unod sa reklamo.
Buot lang ni Abellanosa nga likayan ang tinuod nga isyu sa tataw nga conflict of interest nga iyang nahimo pinaagi sa pagganoy sa iyang kontra sa politika sa maong kontrobersiya. Ang maayo niyang buhaton mao ang pag-andam sa iyang tubag niini inay nga mangawhat pa sa iyang kaatbang sa politika.
* * *