Kun tuohan ang National Aeronautics and Space Administration (NASA), nga mas kasaligan kay sa mga nipasidaan nga mangamatay na ta, way hulga karong 2012 batok sa kapin na sa upat ka bilyon ka tuig natong kalibotan.
Itahan nako ning luna sa mga tubag sa NASA, nga pangahasan nako’g Binisaya, sa mga pangutana sa pagtapos sa kalibotan.
Unsay sinugdanan sa pasidaan nga ang kalibotan matapos karong 2012? Ang istorya nagsugod sa Nibiru, ang giingong planeta nga nadiskubrehan sa Sumerians, nga nagpadung sa kalibotan. Una ning gitag-an niadtong Mayo 2013. Dihang way nahitabo, giuswag sa Disyembre 2012 ug gilambigit sa pagtapos sa kalendaryo sa mga Mayan, ug gitakdang mahinayon sa Disyembre 21, 2012.
***
Matapos bang Mayan calendar sa Disyembre 2012? Sama sa imong kalendaryo sa bungbong sa kusina nga di matapos sa Disyembre 31, ang Mayan calendar di mawa sa Disyembre 21, 2012. Nga maoy kataposan sa Mayan calendar apan—sama nga ang imong kalendaryo magpadayon sa Enero 1—laing long-count period magsugod sab sa Mayan calendar.
Nangagpas bang NASA og total blackout sa kalibotan sa Disyembre 23 hangtod sa Disyembre 25? Wa. Way alignment sa universe nga mosangpot sa blackout. Nakapaalarma sang mensahe ni NASA Administrator Charles Bolden. Ang mensahe igo rang nidasig sa pagpangandam sa mga emerhensiya.
***
Tinuod bang ang paglumbay sa mga planeta makaapektar sa kalibotan? Di maglumbay ang mga planeta sa mosunod nga mga dekada ug bisan maglumbay pa di makatunaw sa kalibotan. Naglumbay ang mga planeta niadtong 1962, 1982 ug 2000. Matag Disyembre ang kalibotan ug ang adlaw magtungod sa sentro sa Milky Way Galaxy apan way daotang epekto.
Duna bay planeta nga Nibiru o Planet X o Eris nga nagpadung ug naghulga sa kalibotan? Ang Nibiru ug ubang planeta pulos bakak. Kun tinuod pa, nakit-an na unta sa astronomers sa niaging dekada, ug mabantang na unta karon. Ang Eris tinuod, apan gamay ra sama ni Pluto nga 4 bilyones ka milya ang gilay-on gikan sa kalibotan.
***
Unsa man ang polar shift theory? Tinuod bang mobali pagtuyok ang kalibotan? Imposible. Ang mga siyentipiko nagtuo nga way magnetic reversal nga mahitabo sa mosunod nga kapid-an ka katuigan.
Nameligro ba ang kalibotan nga maigo sa meteor sa 2012? Ang kalibotan kanunay’ng maigo sa mga kometa ug asteroids, apan tagsa ra kaayo ang dagkong meteors. Kataposan ning nahitabo 65 milyones ka tuig ang nilabay, nga nisangpot sa pagkawagtang sa dinosaurs. Karon way nakita ang NASA nga dagkong asteroids nga sama kadako sa nakapatay sa dinosaurs.
Duna bay kahigayonan sa solar storms karong 2012? May mahitabong solar flares matag 11 ka tuig, nga makadaot sa satellite communications, apan mga inhinyero nakamugna na og depensa. Average nga solar cycle ang mahitabo sa 2012-2014, way hulga sa kalibotan.
***
Email: leo_lastimosa@abs-cbn.com