EDITORYAL - Di kaha tiwasan ang ma-hospital nga Sr. Citizen?
May balaodnon karon nga nag-ung-ong sa kongreso nga nagmando sa mga tambalanan sa goberno nga ipalibre sa tambal, operasyon, ug bayranan sa hospital ang mga senior citizen.
Kaanindot sa maong balaodnon kun mabalaod kini, tungod kay maiban-ibanan man unta ang kaugtas sa mga tiguwang nga magpa-hospital ilabi na kun apiki kaayo sa kuwarta.
Makaluluoy baya kaayo ang mga tiguwang kun masud sa tambalanan, ilabi na kun way mga anak nga moatiman niini.
Kun ang bana maoy mahospital unya ang asawa ra usab maoy mobantay kaniya, nga pareho ra usab sa bana katiguwang, aw puwerte gyung paita.
Vice versa, kun asawa ang mahospital unya ang bana ra usab nga sama kaniya katiguwang ang mobantay, pastilan pagka-makaluluoy sa mga tiguwang.
Apan puwerti gyung tinuora, kay sa ato lang masaksihan sa mga pasyente sa mga tambalanan nga kagamhanan ning dakbayan sa Sugbo, kamakaluluoy baya oy sa mga kabus nga pasyente ilabi na sa mga senior citizen.
Gawas sa mga nagdawat og pension, kadto intawong way pension unya wa gyuy ikapalit og tambal, usahay mohutlay lang dayon ang pasyente ug matug sa dayon nga wa nay mata-mata. Unya kun may balaod na nga ipalibre sa kagamhanan ang mga senior citizen nga mahospital sa mga tambalanan nga iya sa goberno, makapabalaka baya uyamot kining butanga.
Tungod kay kasagaran sa hospital sa goberno kuwang sa tambal tungod kay kuwang sa budget.
Sama niining CCMC sa Cebu City nga nag-uylahot gumikan kay gawas nga kuwang sa tambal, may uban pang mga kawani nga kuwang sa maayong pagtratar sa pasyente.
Unya kun sa higayon nga ang pasyenteng senior magsalig nga librehon sa tambal, hastang serbisyo sa doctor ug sa hospital libre, daghang nabalaka nga gumikan kay way tambal kay way budget, way madawdaw ang doctor kay lagi balaod, di kaha injectionan og paniwas ang pasyente aron maimpas ang tanan?
- Latest
