Ikatulong hilisgutan Ang implikasyon ni Obispo Teofilo Bastida Camomot sa atong kinabuhi
Kay unsa man diay ang pagkabalaan?
Si Papa Juan Pablo II nagkanayon: “Pipila ang gihatagan og kahigayonan nga magpakamatay alang sa pagtuo apan ang tanan gitawag aron pagapuy-an ang pagtuo. Ang pagtuo kinahanglang pagapuy-an adlaw-adlaw sa atong kinabuhi. Matang sa pagtuo nga nakapaduol kanato sa atong gituohan. Matang sa pagtuo nga dili lang intelektwal nga pagyukbo sa bisan unsa nga dili nato masabot ni matugkad apan pagtuo nga mibunga og usa ka halawom ug personal nga pakiglambigit sa Dios nga atong gisimba. Ang CCC 2013 nagkanayon: “Aron makab-ot kining maong kahingpitan, ang mga magtutuo kinahanglang mogamit sa kusog nga gigasa nila gikan kang Kristo aron...diha sa pagbuhat sa kabubut-on sa Amahan sa tanang butang, ang sa kinasingkasing gayud motahan sa ilang kaugalingon alang sa kahimayaan sa Dios ug pag-alagad sa ilang isig kaingon. Ang paglambo sa kinabuhing balaan sa katawhan sa Dios milambo ug mitubo diha sa kasaysayan sa Simbahan pinaagi sa kinabuhi sa mga daghang Santos.” Ang pagkasantos bunga sa pagkamatinud-anon ug pagkamahigugmaon sa usa ka tawo ngadto sa iyang Dios. Kun ang tawo nagkalawom sa iyang gugma kang Kristo, mas mahisama siya kang Kristo. Mahimo siyang laing Kristo (Alter Cristus). Sama diha sa pagkalawat mamahimo unta kita nga mikalawat nga mahisama sa atong gikalawat. (Sumpayan)