Ang atong balaod naghatag og katungod sa magtiayon sa pag-decide kun unsa nga property relations ang ilang gustong ipatuman, mamahimo silang magsabot alang sa complete separation of property, pwedeng absolute community kon paghiusa sa tanan nilang kabtangan ug silang duha mamahimong co-owners niini ug mamahimo sab nga conjugal partnership of gains. Kun separation of property ang gustong property relations sa magtiayon kinahanglan silang motuman sa mga lagda nga gilatid niini sa atong balaod ug kana nga pangutana ang atong tubagon karon.
* * *
Dear Atty. Divine,
Aduna koy pangutana kanimo may labot sa akong mga properties nga akong napalit karon nga ulitawo pa ko gamit ang akong kaugalingong kwarta. Usa ako ka OFW ug ang akong hinigugma atua sab magtrabaho sa gawas. Nagsabot mi nga magpakasal sa sunod tuig ug usa sa mga issue nga amo karong giresolbar mao ang among tagsa-tagsa ka properties. Nagkasabot mi Attorney nga ang mga butang nga among napalit before sa among marriage magpabilin kini nga separate property, nagkauyon mi sa maong kondisyon apan ang akong pangutana attorney kun legal ba ang maong kasabutan? Daghang Salamat. — Gerry
* * *
Dear Gerry,
Ubos sa atong Family Code, ang magtiayon nga magpakasal ang mo governed nga property relations mao kining gitawag og absolute community of property. Sa ato pa, ang imong kabtangan ug iyang kabtangan nga inyong gipanag-iya samtang kamo ulitawo ug dalaga pa mamahimo nang conjugal property ug kamong duha mamahimo nang co-owners niini basi sa Article 75. Apan ang maong balaod adunay exception nga nalatid sa Article 77 sa atong Family Code nga gitawag og marriage settlement. Ang marriage settlement kon kasabutan labot sa separation of property kinahanglan nga in writing ug pinirmahan sa magtiayon og kinahanglan nga ang maong kasabutan himoon before the celebration of marriage o before sa kasal. Kun nagkasabot mo sa imong hinigugma nga magpabiling separate ang inyong properties kinahanglan nga inyong isuwat ang maong kasabutan ug himoon ninyo kini before sa inyong kaminyuon aron mamahimo kining balido. Hinaut nga akong natubag ang imong pangutana.— Atty. Divine
Alang sa inyong pangutana, ipadala lang sa Legal Corner sa Banat News or email sa flores_divina@yahoo.com