Nag ung-ong na sa ubos balay balauranan ang balaudnon nga mag-privatize sa mga tambalanan lukop nasud nga gipanag-iya sa gobyerno. Apil na niini ang Vicente Sotto Memorial Medical Center dinhi sa Sugbo. Rason sa gobyerno sa pagpribado sa mga tambalanan nga iya sa gobyerno mao ang kalidad nga serbisyo nga ikahatag niini ngadto sa mga pasyente. Giklaro usab sa gobyerno nga dili privatization sa mga tambalanan nga iyang gipanag-iya ang ilang gihimo kun dili pagpatuman lamang kini sa programa ni Pangulong Benigno Simeon C. Aquino nga Private-Public Partnership.
Gilipat-lipat na upod ta sa kagamhanan ni Aquino. Sa Private-Public Partnership kinsa man kaha ang mopadagan o modumala sa mga tambalanan? Labing seguro ang pribado. Bisan unsa pa ang ilang ihingalan sa nahisgotang programa dili gayod ikalimod nga privatization ang tumong niini. Sa pag-privatize sa mga tambalanan nga publiko makahatag gyod kaha kini og maayong serbisyo. Ibutang ta nga makahatag kini og maayong serbisyo pero kinsa man lang ang ilang maalagaran o maserbisyohan dili ba ang kadtong makaabot lang sa bayranan? Ang dili makaabot mag-unsa naman lang?
Ang gidusong balaudnon sa ubos balay balauranan kinahanglan nga pugngan ug pakigbatokan sa katawhang kabus tungod kay ang tumong ug tuyo niini mao lamang ang paglisodlisod natong mga kabus ug sa paghinay-hinay nato sa pagpatay. Ang gobyerno nasayod nga lahi ang patakaran sa pribadong mga tambalanan. Sa pribadong mga tambalanan "money down" ang ilang gipatuman nga patakaran busa dili ka makapatambal kun wala kay salapi nga ikapundo tungod kay dili ka nila atimanon.
Kun ang gusto sa gobyerno mao ang paghatag og dekalidad nga serbisyo ngadto sa katawhan, dili diay kini niya mahimo kun dili i-privatize ang mga tambalanan nga iyang gipanag-iya? Gikinahanglan ba ugod nga ipiton ug lisodlisuron ang mga kabus aron makakuha sila og maayo kunohay nga serbisyo gikan sa gobyerno?
Angayang hinumdoman sa kagamhanan ni Pangulong Benigno Simeon C. Aquino III nga mahinungdanon kaayo ang kinabuhi sa matag usa kanato busa iya unta kining panalipdan dili kay ikompromiso sa mga programa ang mga negosyante ra ug mga adunahan ang makapahimulos.