Ang saAng sayop sa piloto yop sa piloto

Sa gipagawas nga resulta sa gipahigayong imbestigasyon sa Civil Aviation Authority of the Philippines o CAAP sa pagkahagsa sa eroplanong gisakyan ni Interior Secretary Jesse Robredo didto sa kadagatan sa Masbate kaniadtong Agosto nasayran sa katawhan nga ang sayop diay sa piloto nga si Captain Jessup Bajenteng ang hinungdan niini.

Ang resulta sa imbestigasyon gipangunayan mismo sa pagpahibalo ni Pangulong Noynoy Aquino ngadto sa katawhang nagpaabot niini. Gawas nga ang sayop sa piloto ang gitumbok nga hinungdan sa pagkahagsa sa eroplano, nasayran usab sa maong imbestigasyon nga gipalusot lang diay ang air worthiness certificate nga nakuha sa Avia Tour alang sa eroplanong nahagsa. Nasayran nga nagkunsabo ang inspector sa Civil Aviation Authority of the Philippines ug ang piloto sa Avia Tour nga gitahasan sa pagkuha sa certificate of air worthiness. Ang air worthiness sa usa ka eroplano mapagawas lamang kun ugaling mahuman na ang ipahigayong test flight niini. Ang eroplanong nahagsa nakakuha sa nahisgotang certificate bisan wala kini mapaubos sa test flight.

Ang imbestigasyon mitumbok sa piloto nga sad-an sa pagkahagsa sa eroplano tungod kay bisan og nagkaproblema na ang makina sa eroplano duol pa unta sa Mactan Airport wala gyod kini mobalik hinuon mipadayon sa paglupad paingon didto sa Masbate ug bisan layo pa kini sa runway sa airport sa Masbate gipagawas na sa piloto ang ligid sa eroplano nga maoy hinungdan sa pagbagal sa iyang paglupad. Sa too usab kuno mopaingon ang liwag sa piloto bisan nasayod ang piloto nga ang too nga makina sa eroplano ang naguba ug mao kini ang hinungdan sa pagtiurok sa eroplano paingon didto sa dagat.

Seguro sakto ang resulta sa imbestigasyon nga gihimo sa Civil Aviation Authority of the Philippines nga sayop sa piloto ang pagkahagsa sa eroplanong gisakyan ni interior secretary Jesse Robredo pero dili seguro tungod kay dili hanas ang piloto sa pagpalupad og eroplano kun dili nasayop lang seguro siya sa iyang karkulo o kalkulasyon.

Sa maong kahimtang nga nag-ungaw ang kinabuhi sa piloto ug sa iyang mga pasahero sa bung-aw sa kamatayon, makahimo pa kaha ang piloto og sayop nga hukom? Kun ikaw ang anaa sa kahimtang sa piloto mohimo kaha ka og sayop nga hukom? Seguro niadtong panahona gihurot na ni Captain Jessup Bajenteng ang tanan niyang nahibaw-an sa pagpalupad og eroplano nga luwas nga makatugpa nga ingon adto ang kahimtang pero nasipyat lang gyod ang iyang pagkarkulo.

Si Captain Jessup Bajenteng giingong maayong mopalupad og eroplano, aduna siya technical expertise niini, only lang nga wala seguro siya’y expertise sa pagpalupad og eroplano nga adunay kuyog nga emotion.

Sa mga panahon nga napagngan na og makina ang eroplanong iyang gipalupad labing seguro nagsagol na ang gibati ni Captain Bajenteng. Labing seguro emotional na siya niadtong panahona ug lagmit mao kini ang hinungdan kun nganong nasipyat ang iyang kalkulasyon nga miresulta sa iyang kamatayon ug sa lain pang duha.

Sa laing bahin, kay nagkonsabo ang inspector sa CAAP ug piloto sa Avia Tour sa pagpagawas sa Air Worthiness Certificate alang sa eroplano sa nahisgotang flying school, posible kaha nga gihimo usab kini sa ubang flying schools o ba kaha sa mga Airline Company?