EDITORYAL - Ang mga sakit sa lawas sa atong mga opisyal

Ang tawo  nga natawo sa silong sa adlaw gitagalan og kamatayon  sa Dios, base  sa nahasulat  sa Biblia.

Apan  una  kuhaa  pagbalik  sa Dios ang  kinabuhi  sa tawo , nagtakda  siya  og  mahimong kapasinginlan  niini.

Ang labing   komon  mao  ang  balatian  sa lawas, kun sundawo, bala  ang  gamiton  sa Dios, ang uban patyon  sa Dios  pinaagi  sa hinagiban, ang uban  pinaagi sa disgrasya  sa sakyanan  sa karsada, dagat ug  kahanginan, ug  uban  pa.

May  mga  tawo  nga  mosulti  gyud  sa tinuod nga sakit   sa ilang lawas aron  ipakita  nila  nga sinsero  sila  sa ilang isig-katawo.

Ilabi  na  kun  di  mananakod  ang  ilang  sakit, wa  silay  ikauwaw  ngadto  sa publiko  kay  ipakita  nila  ang  ilang  pagka-transparent  sa ilang isig-kaingon.

Apan  sa  atong  mga  opisyal  sa dakbayan  sa Sugbo sama  kang  Mayor Michael Rama  ug  Kongresista  Tomas  Osmeña nag-iyahay og panghimakak    sa pasangil  nga  matag  usa  kanila  may  sakit  nga kanser. May  mga  tabi-tabi  nga  kuno  nga  mibalik  ang  kanser  sa pantog ni Tommy, samtang  si Mike giingon  nga may prostate  cancer.

Paita mga kanser man kini   nga lisud  kaayong  ipangihi. Ambot  oi, lisud  baya nga tuohan  nga  may prostate cancer si Mike  kay kanang  sakita  matud pa  sa ubang doctor, motapot lang sa lalaki  nga wa na  makahilabot  og babaye  busa  mobagtok  kuno  ug  mobabag  sa agianan sa ihi, nga  lisud  kaayong tuohan  nga ingon niana  si Mike, kay sa iyang kaguwapo  makalikay  siya  sa chicks? Imposibli. 

Ang  bahin kang Tommy imposibli  usab  kay  abtik naman  kaayo  siyang  misuroy-suroy  sa ilang  pagpanuaw  sa mga barangay  hapit matag  gabii  ug  mura  man  og   wa  na  siya magmulo  sa iyang  bladder cancer.

Pero  ambot kaha  no, unsa  gyud kahay tinuod  niining  tanan ug kinsa  gyud kaha  ang  nagtug-an kanila  sa tinuod.

Ang peligro  niini mao  nga  basin baya  sa panahon sa kinusganay  na  sa  kampanya  sa election mokalit lang  og kaluya  ang  hain  man  kanilang duha, busa  anha dayon dabo-dabuhi  og kulata  sa kontra  aron pagdani  sa katawhan  nga di na  mobotar  niini  gumikan  sa bug-at  niyang  sakit.

Aw kun ingon niini  mas maayo  gyud  nga matag  usa kanila ni Mike ug Tommy  pangulitawhan  gyud  og maayo  ang Dios  nga maoy tag-iya  sa ilang  kinabuhi.

Apan  ang  pangutana kun  nakaila  ba kaha  sila  sa matuod  nga   Dios.