May dahong laya nga natagak

Ginagukod si Leandro sa mga dalaga dinhi sa ilang balangay tungod sa iyang kaambongan. Mora’g artista sa pelikula ang kaguwapo ni Leandro. Ug dili malalis nga daghan usab siya’g mga uyab ug ang tanan ra ba iya gyung gipahimuslan. Sila si Lourdes, Shirley, Fe, Marina, Judy, Mary Ann, Catalina, Maxima, Veronica ug Roda matawag nga nahimong biktima sa kaambongan sa ulitawo.

Karon lang bag-o gisulong siya sa igsoong lalaki ni Rebecca, ang ulahing babaye nga iyang gipamabdosan. Isog kaayo si Anton nga misinggit sa pangalan ni Leandro diha sa ilang tugkaran.

“Kanaog diha, Leandro, kay patilawon tika sa akong komo, amigo kaayo ta ug mao nay imong gibuhat sa akong manghod nga babaye!!” lanog ang tingog ni Anton nga nagsige’g hagit kang Leandro, apan wala gyod mogawas  ni manaog sa ilang balay si Leandro aron paglikay sa kagubot nga moulbo sa higayon nga manaog siya.

Ug paglabay sa daghang mga bulan, wala damha nga nasugatan ni Leandro si Rebecca. Mitambok kini ug misamot ka guwapa. Iyang gisangpit ug milingi kini.

“Leandro, kumosta,” medyo dihay pinugngang pahiyom sa mga ngabil sa babaye.

“Okey lang, ikaw ra man lagi ... hain  man diay ang ... ang ...” ingon sa wala niya lahosa ang buot niyang isulti nga mao ang iyang anak.

“Tua, akong gibilin kang Mama Soling,” hinay ang tingog ni Rebecca.

“Puwede tang magsultianay sulod anang restawran, Bee?’ ni Leandro nga mihangyo nga adto sila sa sulod sa restawran magtiwas sa ilang panagtabi.

Miyango si Rebecca. “Dili lang ta magdugay, ha, Leandro, kay basin og mangita na to ron nako si Junior...”

“Ju-Junior? Mao nay pangalan sa atong anak, Bee?” miiknat ang kilay ni Leandro.

“Oo, Leandro, Jr. ngano man diay, dili maayo?” dihay pahiyom sa mga ngabil ni Rebecca nga ingon sa may kahulogan nga siya ray nahibawo.

“Wala ka diay masuko nako, Rebecca.”

“Nganong masuko man, nga ang lalaki nga amahan sa akong anak, ako mang gihigugma, pero, kaniadto ra...” “Pasayloa ko, nga wala gyod ko magpakabana.”

“Bitaw, sa tanang mga uyab nimo, ako ra gyoy nakaanak. Di man god ko gusto’g gaba, parehas anang uban nga ilang ipakuha ang ilang gisabak.”

“Rebecca, hangtod ron, ikaw pa gihapon ang akong gihigugma...”

“Motuo ko ana nimo, pero, unsaon man, duna na man koy laing gimahal. Si...si Roberto  ug sunod semana magpakasal na mi. Nahibawo man siya nga ikaw ang amahan sa bata. Pero, okey lang kay buotan man si Roberto...”

Ug nananghid si Rebecca nga molakaw na. Didto sa atbang nga kahoy’ng kaymito, nakita ni Leandro ang usa ka dahong laya nga natagak nga gipadlas sa hangin ug kini napadpad paingon sa dalan nga giagian ni Rebecca dili pa lang dugay. (Kataposan)