“Tibuok adlaw man ka sa eskuylahan, kinsa may mahibilin sa inyong balay nga mobantay sa manghod ni Danny?” ni Dino ngadto ni Teresa, mama ni Danny. Naka-hitch og sakay karong hapona sila’s Teresa ug Danny, kay moagi sa Ayala ang sakyanan ni Dino. Adto man sila uli sa Bacayan, unya ang terminal sa dyip naas Ayala.
Sila’s Dino adto uli sa Mabolo. Klasmet ni Danny ang anak sa magtiayong Dino ug Rina, nga si Lina. Grade 3 na sila sa Guadalupe Elementary School.
Samtang nagmaneho sa Toyota Corolla nga abuhon, nakighinabi si Dino kang Teresa nga naglingkod luyo sa front seat. Si Teresa naas kinadaplinan sa tuo. Si Danny sa tunga ug si Lina sa kinadaplinan sa wala.
Nagkatinan-away ug makahuloganon ang tinan-awan nilang Dino ug Rina nga naglingkod tuo ni Dino sa front seat. May gusto lang sutaon si Dino kun unsa ka tinuod ang tabitabi mahitungod nilang Teresa ug Danny. Naa pa sila sa dalan Escario.
“Wa may manghod si Danny. Kinamanghuran siya sa unom ka magsuon” ni Teresa. “Hain man diay ang lima niya ka maguwang?” ni Dino. “Tua sa ilang mga ginikanan” ni Teresa. Naisa ang mga kilay nilang Dino ug Rina. “Sinagop namo si Danny kay wa mi anak sa akong bana nga si Jimmy. Ang amahan ni Danny manghod ni Jimmy. Drayber si Jimmy og dyip de pasaheroan. Maong tibuok adlaw wa sab sa amo. Ako tibuok adlaw nga yaya ni Danny sa eskuylahan” ni Teresa. Nagpaminaw lang si Danny. Wa nagtingog.
“Ok ra diay ni Danny nga wa siya maipon sa iyang tinuod nga mga ginikanan ug mga igsuon?” ni Dino. Naghulat nga motingog si Danny. “Pagkatawo gyud ni Danny, sa puya pa siya, kami na ang nag-atiman. Kami iyang namat-an og buot. Apan wa gyud namo gililong nga pag-umangkon siya’s akong bana. Mobisita usahay mi sa iyang mga ginikanan ug mga igsuon” ni Teresa. “Wa koy gana didto kay palahubog ako’ng amahan. Iresponsable. Unya samok kaayo ilang pamuyo. kay kulang sa disiplina ang akong mga maguwang” sagbat ni Danny. Pagkanaug nila’ng Danny ug Teresa, nakaamgo ang magtiayong Dino ug Rina nga layo ras tinood ang tabitabi. Ang ilang nadungog nga gipagawas gyud ni Teresa nga anak tinuod niya si Danny. Ug masuko kuno og makig-away si Teresa kun itaho nga sinagop lang niya si Danny. [Katapusan]