“Kun di gani ko kagawas sa ospital nga buhi, kuhaa tong gilain nako nga bag sa atong lawak”, ni Eddie samtang naghigda sulod sa ICU sa Green Meadow Medical Center. “Ayaw pagsulti’g ingon ana. Kusgan ka. Himsog imong lawas. Moalim ra ang mga paso nimo”, ni Vicky kapikas ni Eddie. “Paminawa lang una ko. Sa akong trabaho nga usa ka seaman, biyahe gawas sa nasud, dagko kaayo’g bawod, way kasegurohan kanunay akong kinabuhi. Busa, managana ko”, ni Eddie.
“Unsa man diay sulod sa bag,” ni Vicky. “Mga papeles mahitungod sa sperm bank. Kun gusto ka magpaliwat nako, bisa’g patay na ko, buhi akong binhi sa sperm bank. Naa didto ang ngalan ug address sa klinika sa doctor nga mutabang sa pagpanamkon nimo sa atong umaabot nga anak”, ni Eddie.
Lima ka tuig silang uyab ni Vicky. Pagbakasyon ni Eddie karong tuiga, nagpakasal sila niadtong bulan sa Agosto. Kay lagi way problema sa kuwarta (duol milyon iyang suweldo sa siyam ka bulan nga trabaho), nipalit si Eddie og big bike. Pag-road test pa lang niya sa motorsiklo, nadisgrasya dayon siya. Lahi nga disgrasya. Dili crash o bangga. Samtang naniudto siya sa paboritong karenderya uban sa mga barkadang bikers, wa niya pagnga ang makina sa motorsiklo pag-parking.
Wa pa siya kahuman og paniudto, napawong ang andar sa motorsiklo. Iyang gi-ignite kadaghan. Wa gyud niandar og balik. Nagduda siyang nahutdan og gasolina. Giablihan niya ang tangke sa gasolina. Pagkatangtang sa tabon, nisugwak kalit ang gasolina.
Nakaligo siya sa likido. Unya may nikidlap sa makina sa motorsiklo. Gidakop sa gasolina. Nisilaob ang lawas ni Eddie. Nadala siya sa ospital. Tulo ka adlaw siya sa ICU. Ug naglisod og ginhawa. Nakabsan gyud siya sa kinabuhi.
Dangtag usa ka tuig, nagkugos na si Vicky sa batang lalaki nga liwat kaayo ni Eddie. Niduaw siya sa nitso ni Eddie. “Salamat sa imong pagbilin og buhi nga binhi. Malampuson ang gipahigayon ni Dr. Dy nga iventro fertilization. Nagkugos na ko karon ni Eddie, Jr.” ni Vicky nga nagpahiyom. Sakit man ang nahitabo, nakabilin pa iyang bana og liwat.