Matag sayo sa buntag motungas gyod si Adolfo sa bukiran sa Magdugo aron mangahoy. Mao man gud intawoy iyang panginabuhi ang pagpangahoy ug ang iyang makahoy iyang dad-on didto sa lungsod aron ibaligya sa negosyanteng Insek nga si Onsiok. Ug mutando lang pud dayon si Adolfo. Pobre man gud si Adolfo ug ang iyang inahan na lang nga masakiton maoy uban kaniya ug ang manghod niya nga buta nga usa ka dalaga. Ug kay wala lagi nakab-ot nga kinaadman si Adolfo kay kutob lang intawon sa Grade 2 maong pangahoy na lang gyud ang iyang nabuhian nga maoy iyang ibuhi sa iyang manghod nga buta ug sa masakiton niyang inahan.
Pag-abot niya sa bukid nahiagi siya’g langob nga gitugkan ang tugkaran sa baba niini og usa ka dakong kahoy nga akasya. Misulod si Adolfo apan kalit lang may miwitik ug sa sunod nga mga gutlo gitukob ug gilamoy na siya sa usa ka dakong sawa. Ug didto siya iluwa sa usa ka daw palasyong balay. Giabiabi si Dolfo sa usa ka maanyag nga babaye. Tag-as ang buhok niini, puti ang pamanit ug taluytoy ang ilong, ug nindot kaayog lawas.
“Dolfo, kaila man ko nimo kay kanunay ta man kang makita dinhi sa kakahoyan nga mangahoy. Kahibawo pud ko nga lisod kaayo ang inyong kahimtang kay masakiton ang imong inahan ug buta ang igsuon mong dalaga. Karon, tagaan ka nako’g trabaho, ikaw na ang dakodako sa mga guwardiya namo dinhi sa among palasyo. Ako diay si Adariza, ang anak prinsesa sa hari sa mga engkanto...”
Unya, paglabay sa daghang mga bulan, nakugang ang mga silingan ni Adolfo kay mikalit man sila’g kadato. Duna nay mahalong kotse si Adolfo. Dako ug nindot na ang iyang balay. Ug ang iyang inahan duna nay doktor nga nagmintanar sa paghiling sa sakit niini. Matag Biyernes duna gyo’y madungog ang mga silingan nga awit sa langgam nga alimukon nga magbatog sa dakong kahoy atbang sa balay nilang Dolfo. (Katapusan)