Gula 38
Nakita ug nabati ni Carlo nga nanghupaw ang amahan miduol kini kaniya mitupad sa paglingkod.
"Pasensiya kana ha nakulatahan tika," matud pa ni Arturo nga mihapuhap sa buko-buko sa anak.
"Okay ra pa oy," matud pa ni Carlo dayong higop sa kape.
"Sakit pa ba ni?" Mihikap og hinay sa lagom sa nawong agi sa iyang pagkulata.
"Wala na man ni sakit pa," pulong pa ni Carlo sa huna-huna ni Carlo, nga bisan sa kabadlongon sa iyang amahan pinaagi sa pagkahimabaye apan dili gayud hitupngan ang pagmahal niini ngadto kaniya. Pagpangga sa amahan ngadto sa anak diin siya maoy bugtong bahandi niini sa kinabuhi. Wala man tuod masayod si Carlo kun may mga anak ba ang amahan sa laing babaye apan dili kini mamahimong rason aron wad-on niya ang dako niyang respito ngadto sa amahan.
"Pasensiyahe na gyud si papa ha wala lang kapugong si papa sa gibati maong ingon og gidagmalan tika nahibawo kong may kahiubos ka nako. Nahibawo ko nga nagdumot ka nako tungod sa akong pagkulata nimo pero anak gusto kong masayod ka nga walay butang sa kalibutan nga pwede nakong ikabaylo nimo mangabit man ko'g kadaghan apan dili mahimong ibaylo tika nila. Pinangga ka kaayo ni papa," matud pa ni Arturo nga nahimong emotional tungod sa nakitang mga lagom sa nawong sa anak. Naluoy siya nga nagtan-aw kang Carlo may mga luha na usab nga migitib sa iyang mga mata miagbay sa anak dayong mihapuhap sa iyang ulo. Midugang sa pag-ingon si Arturo ngadto sa anak, "mahal gyud kaayo tika Carlo." Sa nabati ni Carlo, wala sab niya kapugngi ang iyang emotion nakahilak kini nga naminaw sa mga pulong sa pagmahal gikan sa baba sa amahan nga mapinanggaon.
"Wala man ko mahiubos nimo pa nakasabot man sad ko nimo. Nakasala ko ingon og gipakaulawan tika gumikan sa akong gibuhat mi-undertime sa trabaho aron lang asikasohon ang akong kaso sa pagpangulata og driver pasayloa sab ko pa mahal sad tika," matud pa ni Carlo nga migakos sa amahan.
Bisan og ulitawo na si Carlo, wala kini igsapayan ni Arturo, gipakasama gihapon kini niyang usa ka bata ingon niini kun mopakita og pagpangga si Arturo kaniya daw iyang binataon. O.A.man nga paminawon ug kun makita sila sa uban apan dili kini nila panumbalingon kay sama kang Arturo ug Carlo, walay OA sa pagpakita og pagmahal ug pagpangga sa usa'g-usa. Ang pagpangga dili lamang sa buhat kun dili inubanan usab kini sa mga pulong.
Salawayon man ang gibuhat sa iyang papa gumikan sa pagsige'g pagpangabit niini apan dili kini maoy babag aron dili mopakita si Carlo og pagmahal sa iyang papa nga mao say nahimo niyang idolo.
Nahimo mang badlongon si Carlo, apan dili kini maoy rason aron hunongon ug taposon ni Arturo ang pag-atiman ug pagmahal sa anak. Mahanaw man ang tanang babaye nga iyang gikalambigit apan ang anak magpabiling iyang anak. (Sumpayan)