Mapahiyomon nga nagunit sa abaga ni Carlo ang amahan, nagkanayon, “ganahan ka niya?”
“Ha?!” pagkakurat ni Carlo sa pulong sa amahan.
“Matud ko, ganahan ba kang Lina.” Matud pa sa amahan ni Carlo dayong mitalikod sa nahimutangan sa ulitawo. Misunod si Carlo ug milingkud sa sofa diha sa ilang sala, samtang ang amahan mipadayon sa kusina nga nag-brief lang. Nagkuha og baso ug miabli sa ilang ref aron moinom og bugnaw’ng tubig. Gi-on ni Carlo ang tv. Human usab sa pipila ka pagpanlad-ok sa tubig, subli nga nangutana ang amahan, “ganahan ba kang Lina?”
“Nganong nangutana man ka kun ganahan ba kong Lina, pa? Imo man to siya? Kalain pod paminawon nga magsawo ta sa usa ka babaye uy,” matud pa ni Carlo.
“Mao na toy kataposang hunat. Dili man siya ganahan sa akong mga style. Ug nahibawo ko dili na to mobalik nako. Nagtuo siguro siya nga mogukod ko’g babaye.” Matud pa sa amahan ni Carlo, dayon misulod pagbalik sa iyang kwarto. Nanghupaw si Carlo. Wala ang huna-huna sa gitan-aw sa salida sa tv. Naghunahuna sa nahitabo dili pa lang gyud dugay. Nakaingon ang ulitawo nga iya kahang i-apply ang nakita niya sa iyang amahan nga gibuhat ngadto kang Lina? Mingisi na lang si Carlo, pipila ka minuto ang nakalabay, nabati ni Carlo ang tingog sa amahan didto sa kwarto niini, “pagluto og kan-on, Carlo. Unya pagpalit og sud-an sa gawas kay gigutom na ko. Kuhaa ring kwarta diri.”
“Oo pa. Kadiyot lang,” dason ni Carlo. Human gipalong ang TV, mipaingon kini sa kusina aron maglung-ag. Human gitak-ang ang kaldero, misulod sa kwarto sa amahan ug gikuha ang kwarta. “Natak-ang nako’g kan-on. Palihug na lang ko’g tan-aw-tan-aw adto pa.” Matud pa ni Carlo. Igo lang mitando ang amahan niini nga busy sa pagpanghapnig sa nagkatag sa kwarto.
Dihang naabot na si Carlo sa kalsada diin adunay naninda og litsong manok may ikasugat siya, si Eser nga usa ka parlorista. Usa ka bayot nga dugay ra kaayong naibog niya. Mitimbaya kini niya.
“Hi, Carlo.” Matud pa ni Eser nga nagpa-cute kang Carlo. Sa ilang dapit, way bayot o bisexual ang dili maibog sa ulitawong si Carlo. Ubay-ubay sab sa ilang dapit ang adunay kaibog sa lalaki. Sa pagtimbaya ni Eser niya, igo lang kining mibawos og pahiyom. “Asa man ka oy?” matud pa ni Eser nga migunit sa bukton ni Carlo.
“Magpalit ko’g among masud-an ni papa,” tubag ni Carlo kang Eser.
“Bisitaha sad ko sa akong parlor oy,” matud pa ni Eser. Igo lang mingisi ang gwapong si Carlo. Ug gikilig sab ang bayot nga si Eser, “da uy, sige’g smile ha, smile pa lang nimong daan Carlo, mora na kog gikuryentihan,” matud pa ni Eser nga morag ering gibidli. “Ngano gong mora man kag makuryentihan?” matud pa ni Carlo nga nagsugod na pagkalingaw kang Eser. “Ang-ang, smile pa lang nimo mora na man og duna nay taas kaayong boltahe sa kuryente,” matud pa ni Eser.
“Pag-sure diha oy,” dayong katawa ni Carlo.
“Patilawa unya ko nimo,” matud pa ni Eser nga mikusi og pinapino sa kilid ni Carlo.
“Unsay patilawa ba? Unsay pagtoo nimo nako? Pagkaon?” matud pa ni Carlo nga nagpagoryo-goryo. Nasayud ang ulitawo kun unsay buot ipasabot sa bayot nga si Eser.
“Baya siya. Nahibawo na ka sa buot nakong ipasabot oy. Ultimate crush baya tika. Ug nahibawo ba ka nga nakatilaw na man sab ko sa imong papa? Super ka okad. Mora gyud ko’g gibayaw sa cloud nine. Take note, dili lang kay kausa,..nahimo pa gyud na nakong suki ang imong papa sa una no. Mamayotay baya nang imong papa sa ulitawo pa.
Ikaw sab ha, sukion tika. Ayaw’g kabalaka kay dili tika tiwayon no,” matud pa ni Eser. “Ayaw ko’g iparehas sa akong papa oy. Lahi ang akong gusto,” matud pa ni Carlo. “Ha? Lahi ang imong gusto? Pag-sure oy. Makurat man sad ta’g pinakalit, ayaw ko’g ingna nga...nga..nga...” wala ipadayon ni Eser ang buot isulti niini.
“Nga unsa, bayot?” pangutana pa ni Carlo.
“Nga lalaki sab ang imong gusto! Bayot ka, Carlo?” Matud pa ni Eser nga nakapasiga sa mata sa ulitawo, wala makauyon sa tabas sa dila sa bayot. (Sumpayan)