Gula 8
"Duol man ka? Lagot baya ko nimo ha. Bugal-bugal ka naku ganiha." Matud pa ni Carlo.
"Chill lang gud. Ayaw'g lagot-lagot diha gud." Matud pa ni Vincent nga miagbay kang Carlo.
"Unsa may tuyo nimo?" bug-at nga tono sa pangutana pa ni Carlo sa classmate.
"Kuyog ta." Matud pa ni Vincent.
"May klase pa man ta, asa man ta mangadto?" Pangutana ni Carlo kang Vincent.
"Dili ta manulod sa sunod natong klase. Adto ta kilid ining eskwelahan. Sa gawas ba. Naa may imnanan didto. Mag inom ta." Agni ni Vincent. Wala dayon makatingog si Carlo sa gisulti sa iyang classmate. Morag sa hunahuna niini nga maayo ang idea ni Vincent.
"Sige, kuyog ko. Kinsa may atong kauban?" pangutana ni Carlo.
"Sila si Tribor ug Pikot." Dason ni Vincent.
"Sige, inom ta aron makondisyon ko ug maisog og samot. Naa koy resbakan ron." Matud pa ni Carlo nga nagpangagot.
"Ha? Resbakan? May kontra ka? Kinsa may imong resbakan?" interesadong tono sa pagpangutana ni Vincent kang Carlo.
Ang tawo nga usa sa nakaingon nga naglagot naku hangtud karon si Marissa." Matud pa ni Carlo nga naminti.
"Kinsa lagi na? Kay tabangan nato." Matud pa ni Vincent nga pina-barumbado pang milihok sa iyang lawas nga ala-Robin Padilla. "Lalaking daku. Babaye kaayo’g baba. Bayoti. Kay kun dili pa siya bayoti'g baba, dili siya mosulti ni Marissa sa akong gisulti niya." matud pa ni Carlo.
"Ayyyy susss!, nahibawo ko'g kinsa na. Si Larry?" matud pa ni Vincent.
"Oo siya. Napun-an ang iyang sala naku, kay ganihang buntag, iyang gidasmagan ang akong lalabs, nabusdak gud tawon ang sampot sa akong mahal nga si Marissa, wala lang gani tabangi sa animal. Gibiyaan nga napayaka ang akong lalabs. Lagot kaayo ko anang tawhana. Akoy moresbak sa iyang gibuhat ni Marissa. Karon na ang adlaw sa pagpaningil, apil na ang pagpaningil ko sa iyang ka baba-on." Matud pa ni Carlo nga desidido na sa buot nga buhaton kang Larry.
"Gusto ka nga atong tabangan? Sulti, kay, nah! Di gyud siya kaeskwela inig ka ugma!" Matud pa ni Vincent nga aresgado sad kaayong mobokbok ni Larry.
"Ayaw lang bay. Ako ning laro. Tan-aw lang mo. Sige, tagay ta." Matud pa ni Carlo.
Uban nila ni Vincent ug Carlo sila si Pikot ug Tribor nga utrong mamaligrahay kaayo’g nawong. Pag-abot nila sa tindahan, mi-order una sila'g usa ka botelyang beer, nipalit sab og ice ug sigarilyo. Gisugdan ang tagay. Hilom nga mitungab sa baso si Carlo, may gihuna-huna. Nagpanglingo-lingo, lihok sa wala mahimutang tungod sa iyang gustong buhaton kang Larry.
"Si Marissa bay, in love gyud ka niya?" Si Pikot nga maoy mibuak sa kahilom sa grupo.
"Kun ma-uyab naku si Marissa, bay. Ako na siguro ang labing malipayong lalaki sa tibuok kalibutan." Tubag pa ni Carlo.
"Unya kay lagot man kaayo na nimu si Marissa?" Pagsalga pa ni Tribor.
"Si Larry ang hinungdan ining tanan. Kun dili pa tungod sa iyang kababa-on, dili unta masuko naku si Marissa. Bantay lang gyud ni naku si Larry." Matud pa ni Carlo nga naminti.
"Unya, nahibawo na ka asa na mag-agian si Larry?" pangutana ni Vincent.
"Aw, asa pa sa gate sa eskwelahan." Matud pa ni Pikot nga gidunganan og katawa dalang bugal-bugal. Gitan-aw ni Carlo ang mibuhakhak nga si Pikot, mikisdom ang nawong sa lalaki. (Sumpayan)