Gula 8
Wala g’yud magdahom si Cesar nga maangkon niya ang gugma ni Alma atol sa mao nga higayon. “Wala ka diay boyfriend nga sama kanimo nga Muslim, Al?” gisukna ni Cesar ang iyang girlfriend.
“Dili lagi ko gusto nga mamana og Muslim kay sagad man gud nga daghan kini og asawa. Gusto nako Sar nga ako ra g’yud ang higugmaon sa akong bana, ug kana maoy akong ihangyo nimo kun kita magkadayon,” matud ni Alma.
Tam-is kaayo ang ilang pagparayganay ni Alma ug Cesar samtang nagkabugnaw na ang kagabhion sa Plaza Independencia. “Abi nimo Al, gusto ‘sab g’yud nako nga usa ra ka babaye ang tugyanan ko sa akong gugma. Dako’ng binuang ang daghan og mahalon,” ni Cesar.
Ingon sa wala tuyoa nga gibayaw sa kalipay si Alma ug nagakus niya si Cesar. Nagdikit na ang masi’g nila ka kalawasan ug wala nila kapugngi ang nagkainit nila nga mga pagbati nga ingon sa gibayaw sila sa kahitas-an.
Nag-akob ang ilang mga ngabil nga puno sa pagmahalay. “Abi nimo Sar, may nanguyab ‘sab nako kaniadto nga usa ka Kristiyanos, apan wala nako sugta kay supak lagi sa among tinuohan nga makigrelasyon og dili pareho namo. Apan karon, dili na g’yud mahimo,” ni Alma.
“Pakigbisogan nato ang atong gugma Alma. Andam ako nga mag-antus tungod ug alang sa atong gugma,” gisaaran ni Cesar ang maanyag nga Muslim.
“Ingon man usab ako Sar, ang pinitik na sa akong kasingkasing karon maoy akong sundon,” ni Alma pa. (Sumpayan)