Giluod sa dagway

Sus! kun aduna ka pa’y ikog animala ka, unggoy g’yud ka nga tan-awon nianang imong dagway! Lud-on ko nga magtan-aw nianang imong hitsura mao nga mentras wala pa kita makasal, magbulag ta!,” matud ni Sheena, nga iyang kapuyo.

“A-apan wala ako’y nabuhat nga sala nimo,” pakilooy tawon ni Jherwin. “Wala bitaw! Apan nakahukom na ko... ug mao kana ang akong desisyon,” pintok ang tingog ni Sheena.

Wa g’yud mausab ang hukom ni Sheena bisan pa og mipatulo sa iyang mga luha si Jherwin ug miluhod aron lang malooy kaniya.

Miuli g’yud kini sa iyang mga ginikanan ug gibiyaan si Jherwin nga nag-inusara. Naglibog si Jherwin sa kalit nga kausaban sa taras ni Sheena.

Nahanaw na ang kanhi hinayon ug paraygon niining tingog nga maoy pipila ka hiyas nga nakapadani sa iyang pagbati kaniadto. Milubad ang kinaiya ni Sheena. Sukad niadto wala’y adlaw nga dili hubog si Jherwin. Lumsan niya sa bino ang iyang kaugalingon aron makalimtan ang iyang kasakit.

Diha’y pipila ka higayon nga iyang gisungko si Sheena didto sa balay sa mga ginikanan niini. Namasin siya nga malooy na kini kaniya apan nagpabilin kini nga tig-a og kasingkasing.

Tungod ning mapait nga kasinatian sa gugma ni Jherwin, napasagdan niya ang iyang kaugalingon lakip na ang iyang trabaho. Hangtud nga natangtang si Jherwin sa trabaho tungod sa kanunay nga pagpalta.

Dala ang masakit nga gidangatan sa iyang gugma, mipauli si Jherwin sa iyang ginikanan. Didto iyang natugkad kun unsa kadako ang kadaot sa iyang ugma tungod sa pagkaulipon niya sa gugma ngadto kang Sheena.

Niini karong gabhiona, nakahukom si Jherwin nga molingkawas siya sa sulad nga mugna sa gugma ni Sheena.

Nangareglar siya sa iyang kaugalingon. Pamisitahan niya si Khamil, ang babaye nga nakagusto kaniya kaniadto apan wala niya mahatagi og tugbang nga pagbati.

Apan pag-abli niya sa pultahan sa ilang balay, maoy misugat sa iyang mga mata ang pamayhon sa usa ka babaye.

“Pasaylo-a ko Jherwin sa akong nabuhat ug nasulti nimo kaniadto,” nagpakilooy kini kaniya nga luhaan ang mga mata. Gusto unta niya kini nga gakson apan nahimut-okan siya. Diha’y kausaban sa iyang panglawas.

“Imong anak kining akong gisabak. Buntis diay ko niadtong nakigbulag ko nimo kay batian ug lud-on ko nga magtan-aw sa imong dagway,” matud ni Sheena.

 “Da! Daan pa lagi ko nga pangala ra g’yud to,” sagbat sa inahan ni Jherwin nga diha ra diay sa ilang duol ug nagpaminaw. (Kataposan)