Gula 7
Nasuta na g’yud ni Lito nga gusto na ni Grace nga makigbulag kaniya. Prangka kaayo kini nga mibutyag nga dili na magpakuha kang Lito kay adunay mokuha kaniya nga laing lalaki.
Nakaagpas na si Lito nga kadtong tag-iya sa kotse nga mikuha ni Grace kagabii mao na usab ang mokuha sa dalaga unya. Ingon sa gidat-ogan sa kalibutan si Lito kay daku g’yud unta ang iyang tinguha nga makigminyo na gani kang Grace.
Naglibog si Lito kun tumanon ba niya ang giingon ni Grace nga dili na siya gusto nga kuhaon iniggawas sa department store. Misulod si Lito sa usa ka imnanan nga nahimutang dili halayo sa department store.
Alas sayes pa ang takna, ug kapin sa oras pa sa dili pa manggawas ang mga kawani sa department store. Gikan sa imnanan nga gisudlan ni Lito tataw ra niya nga malantaw ang employees exit sa department store.
Giyarok lang ni Lito ang pipila ka botelya sa beer. Buot niya hubgon ang iyang kaugalingon aron makalimtan ang iyang kagul-anan. Naghinuktok siya kun unsay maayong buhaton.
Misangpot sa iyang huna-huna ang panultihon nga kun nahigugma ka sa usa ka tawo, andam ka nga magpasakit ug suportahan nimo kun asa man malipay ang imong gimahal.
Gipiyong paghugot ni Lito ang iyang mga mata ug dungan sa paghukom nga pasagdan niya si Grace nga motalikod kaniya. Iyang nahuna-huna nga tingali kuwartahan gayud ang lalaki nga gipili ni Grace nga ihulip kaniya. (Sumpayan)