Gula 5
Human mapalit ang iyang giorder nga mga pagkaon, mipauli na si Lito sa iyang gipuy-an, apan wala siya ganahi nga mikaon.
Dugay siya nga nakatulog. Gisigehan niya pagbalik-balik pagkontak ang numero sa cellphone ni Grace, apan dili gayud makontak. Hangtud nga nakatulog na lang siya.
Pagkabuntag, gitan-aw ni Lito ang iyang cellphone. Minghoy siya kay wala g’yuy bisan usa ka text message gikan ni Grace. Subo kaayo ang adlaw ni Lito.
Paggawas ni Lito sa iyang gitrabahoan, midali pag-adto si Lito sa department store nga gitrabahoan ni Grace. Nagpabilin nga dili makontak ang numero sa dalaga. Lain na g’yud ang gibati ni Lito.
Layo pa gani, nalantawan na ni Lito si Grace nga nagbarug ug nag-akbo sa mga panapton nga iyang gibantayan. Gilipot ni Lito si Grace aron dili dayon siya madiskitahan.
“Good afternoon,” matud ni Lito nga kalit lang mipatim-aw sa luyo ni Grace. Nahaigpot si Grace ug hilaw kaayo nga mipahiyom kaniya. “Kumusta ka?” ni Lito pa.
“Oki lang,” mubo nga tubag ni Grace dungan sa paglingiw. Ingon sa dili gusto nga motan-aw si Grace kang Lito. “Naunsa ka man nga bugnaw ka na man kaayo’g tinagdan nako ug dili ka na usab makontak,” gisukna ni Lito ang dalaga.
Giingnan ni Lito ang dalaga nga magpaabot siya sa gawas inig-off niini sa trabaho. Apan gibalibaran siya ni Grace. “Dili na ko makigkuyog nimo, dunay mokuha nako unya,” pintok nga tubag ni Grace. (Sumpayan)