Gula 1
Gikaila ni Grace si Lito diha nga mikuha siya og kopya sa iyang birth certificate sa Philippine Statistics Office. Gitabangan siya ni Lito sa pag-fill up sa iyang form sanglit dili suheto si Grace kay igo lang siya nga nakatapos sa high school.
Apan bisan og igo lang nakahuman sa high school si Grace, dili siya mahibaw-an tungod sa iyang kaanyag ug sa kanindot nga pamorma sa iyang lawas. Kini gani maoy hinungdan nga klaro kaayo nga naibog kaniya si Lito.
May kaila diay si Lito sa PSO ug natabangan si Grace sa pagkuha sa iyang birth certificate nga dali ra kaayo. “Mag-snack usa ta diha sa atbang nga fast food restaurant,” agni ni Lito kang Grace.
Nalipay kaayo si Grace sa ilang panagkaila ni Lito kay wala siya maglisud sa pagkuha sa dukomento nga kabahin sa iyang mga requirements sa pagpangaplay og trabaho.
Nahibaw-an ni Lito nga mangaplay og trabaho si Grace. Gitabangan niya kini hangtud nga nakasulod gayud kini sa usa ka department store. Nagkasuod sila pag-ayo sa paglabay sa mga adlaw.
Buy & Sell ang negosyo ni Lito. Mopalit siya og mga sakyanan, unya iya kini nga panindoton, dayon ibaligya na usab sa taas nga presyo. Miabot ang panahon nga nagkahinigugmaay gayud sila si Lito ug Grace. Sa unang mga adlaw, semana ug mga buwan, malipayon kaayo sila sa ilang relasyon.
Apan miabot ang adlaw nga may karibal na si Lito sa gugma ni Grace. (Sumpayan)