Human sa pagkanta ni Art sa I Will Always Love You in Kenny Rogers, gitunol niya ang microphone ngadto ni Shane. “Biliba nako nimo mokanta Art uy, mura man g’yud og original,” matud sa dalaga nga dala ang bulatik.
Mingisi si Art. Aw bisan si Art mismo nasayod nga maayo siya mokanta kay gani nakadaog man siya sa pagsalmot niya og amateur hour nga gipasiugdahan sa radio station DYCM nga anaa himoa matag Domingo sa usa ka department store sa Colon.
Mitindog si Shane nga naggunit sa microphone. “Wow, sikat man kana nga kanta ni Cherry Gil, meaningful pa g’yud ang lyrics,” matud ni Art diha nga misugod na pagpasakalye ang awit nga Boy.
Memoryado ni Shane ang lyrics sa mao nga kanta ug gani, diha’y mga higayon nga dili na siya motan-aw sa screen ug giatubang na niya si Art. Nagkinataw-anay sila si Shane ug Art.
“Mangaon usa ta uy kay gihatud na ang atong order nga pagkaon,” giingnan ni Art si Shane ug ang kauban nila nga si Lorena. “Dalia ra nato nagkasuod Art no? Ganina pa gani ta nagkita didto sa karenderya, unya karon nagkuyog na ta,” matud ni Shane.
“Gikalipay nako ang atong panagsuod Shane. Suwerte kaayo ko nga nakahigala og guwapa,” matud ni Art nga mipakapin og ulog-ulog ngadto sa dalaga. Gihatagan nila og higayon nga makakanta si Lorena. Unya, nagbayloay og contact numbers sila si Art ug Shane. (Sumpayan)