Gula 56
Gisukna sa hepe sa kapolisan si SPO1 Nicko Bernal kun nakakita ba sila’g patay’ng lawas didto sa dapit sa bukid nga may mga sakop sa Bangkulis nga nagpahigayon og ritwal.
“Wala mi nakita nga patay, sir. Pulos mga dinagkotang kandila ra ang among nakaplagan sa maong dapit. Gawas niini, wala nay lain,” matud ni Nicko.
“Kun mao kana, Nicko, posible’ng anaa sa barangay Sun-ok maglublob ang mga Bangkulis,” matud ni Chief Inspector Dindo Raval.
“U-unsa?” wala magdahom si Nicko nga mao kadto ang pangagpas sa hepe.
“Kinahanglan nga i-surveillance ninyo kanang dapita kay nagduda ko nga daghan na ang nagpasakop sa kulto nga mga molupyo sa maong barangay,” sumala pa ni Chief Inspector Raval.
“Posible nga husto ang imong pangagpas, sir.
Sige, panid-an namo ang kalihukan sa katawhan sa Barangay Sun-ok. Aw, sir, nakadawat ko’g tawag gikan sa usa ka babaye,” misugod pagsaysay si Nicko.
“Kinsa man ang maong babaye?” pangusisa sa hepe.
“Wala siya magpaila sa iyang kaugalingon, sir, apan nasabot ko sa iyang sinultihan nga sakop siya sa Bangkulis Black Brotherhood.” – Sumpayan