Gula 17
Gisungog pag-ayo sila si Lyn ug Kenn sa ilang mga kabarkada kay nakabantay na sila sa talagsaon nila nga kasuod.
Gani sa ilang paglakaw paingon sa ilang pagpauli, nag-ampad gayud sila si Kenn ug Lyn. Pag-abot nila sa balay, dugay pa kaayo sila nga nangatulog, nagsabot sila sa ilang pagpangaligo sa dagat pagka buntag.
Alas tres na sa kaadlawon sila nga misulod sa ilang higdaanan. Nagkinihatay lang sila si Kenn ug Lyn sa dayon nila nga panagbuwag. Wala g’yud dayon makatulog si Kenn.
Iyang gihuna-huna ang mga malipayon nila nga mga gutlo ni Lyn diha nga mikalit pag-brownout didto sa baylehan. Pagkabuntag, hayag na nga mibangon si Kenn.
Pagmata niya, iyang nakita nga nagmata na diay si Lyn. “Good morning Lyn,” gitimbaya niya ang iyang sweetheart dungan sa paghikap sa iyang abaga.
Atol nga mao g’yud ang paggawas sa kuwarto nila ni Alice ug Clemen nga wala makapugong sa pagpahiyom. “Pagka swerte g’yud nimo Lyn uy, nakakita man dayon,” matud ni Alice nga wala makapugong.
“Angayan man ‘sab kaayo mo’ng duha nga magpares,” dason ni Clemen. Migawas si Nympha nga igsuon ni Kenn. “Unsa tong akong nadunggan? Nagkasabot na si Kenn ug Lyn?” ni Nympha.
“Tinuod ba nga angayan mi’ng duha Ate?” matud ni Kenn nga mipahiyom. “Haum kaayo nga iselebrar nato sa dagat ang ilang pagka sweetheart,” ni Alice. (Sumpayan)