Gula 4
Bisan og pipila pa lang ka gutlo gikan sa ilang panagkaila, nasabtan na ni Kenn nga pormalon nga pagka babaye si Lyn. Igo lang gani kini nga mipahiyom nga nagsud-ong sa duha niya ka kauban nga mikiay-kiay dayon sa pagkadungog nila sa tugtog gikan sa amplifier sa baylehan sa Barangay Tinubdan.
“Dili ka ba hilig og disco didto sa siyudad Lyn?” gisukna ni Kenn ang dalaga. Sa wapa motubag si Lyn, mibuhi usa kini og usa ka matam-is nga pahiyom ngadto sa ulitawo. “Dili kaayo hilig og disco. Nature lover g’yud ko Kenn ug mao gani nga mikuyog ko dinhi sa inyo aron akong makita ang nindot nga lugar dinhi, unya selfie dayon.”
Gibutang usa ni Kenn ang gibitbit niya nga plastic container nga puno sa tubig ug gitudlo niya sa tulo ka dalaga ang nindot nga baybayon sa unahan nga tahom kaayo nga sud-ongon, ilabi na nga aduna kini taytayan.
“Hala! kanindot diha no? Puwede ta mangadto karon didto Kenn?” matud ni Lyn nga mura’g wala mahimutang nga nakalantaw sa nindot kaayo nga talan-awon. “Sure, mangadto ta karon didto. Magsakay lang ta og motor,” matud ni Kenn dungan sa pag-aswat na usab sa container nga puno sa tubig.
Tuod, giagni ni Kenn si Lyn nga manuroy sila sa daplin sa dagat. “Uy, uy, ayaw mi’g ingna nga kamo ra ang mangadto didto? Uban ‘sab mi uy,” matud sa duha ka dalaga nga sila si Alice ug Clemen. Gi-hire nila ang usa ka habal-habal ug nag-angkas ang duha ka dalaga.
Pag-angkas ni Lyn sa motor ni Kenn, wala tuyoa nga nabag-id ang dughan sa dalaga ngadto sa buko-buko sa batan-ong ulitawo. (Sumpayan)