Atol sa pagbalaan sa kasaulogan sa mga adlaw sa Semana Santa, mikumpisal si Miguel sa usa ka pari sa ilang parokya.
“Nagdilaab ang akong kalagot, Padre! Nagdumot ko kanila...!”
“Isaysay kun kinsa ang mga tawo nga imong gikalagotan ug nganong nagdumot ka nila...?”
“Una, ang maestra kong asawa, Padre nga nagbudhi nako sa hilom! Ug ikaduha, ang akong kumpare nga maoy kabit sa akong asawa...!” “Wa ka bay pagkulang sa imong asawa...?’
“Tanang kaharuhay sa pagpuyo gihatag ko kaniya, Padre! Manedyer gud ko’s banko! Gawas lamang sa anak, kay hangtod karon, wa pa gyud makaanak ang akong asawa....!”
“Duna ka bay diperensya, mao nga di makapaanak...?”
“Wala koy diperensya, Padre! Parehas ming nagpa-eksamin sa usa ka espesyalistang doktor! Wa mi diperensya sa usa’g-usa....!”
“Wa ba ka malimot o magpasagad sa tulumanon sa imong asawang maestra? Kanunay mo ba siyang gialagaran...?”
Dugay nga wa makatubag si Miguel.
“Wa ka ba unang nagbisyo og babaye, ilabi na nga manager ka’s banko?” laing sukot sa pari, luyo sa pagkahilom ni Miguel.
“May kabit sab ko, Padre! Ang guwapa ug bigot nga CPA nga maoy accountant sa gidumala kong banko....!”
“Daan pa gyud ko! Gitugbangan ang imong bisyo sa imong asawa nga nagbisyo sab. Kay Semana Santa na karon, angay na mong magbag-o ug maghinulsol sa inyong mga sala....!”
“Mao bitaw nga gihimo ko karon ang pagkumpisal nimo sa tanan, Padre!”
“Pasayloa sila sa tanan nilang kalapasan! Oo, Pasayloa sila! Pasayloa ang imong asawa ug pasayloa usab ang imong kumpare. Kay sa ingon nga paagi, pasayluon usab ikaw sa Ginoo sa tanan mong mga sala. Alagari og sakto ang imong asawa aron kamo makaanak. Biyai ang imong kabit aron mapasaylo ka usab sa imong kumpare...!”
Nahauknol si Miguel. Nakatag-an man ang pari! Kay ang gikabit niya nga guwapa ug bigot nga CPA sa gidumala niyang banko, mao man ang asawa sa iyang kumpare! (Kataposan)