Siya ug ako sa kangitngit - Gula 30

Mibangon ko apan abtik nga mipugong si agaw Paulo pinaagi sa paggunit sa akong bukton. “Asa ka?” Nangutana siya.

“Moadto ko sa CR,” maoy akong tubag. “Pagdali,” niya pa dayong buhi sa akong bukton. Human ko makatuman sa sugo sa akong lawas, wala dayon ko mogawas. Naghilak ko sulod sa CR.

Naglagot ko’g maayo sa akong ig-agaw nga salbahis. Diha’ng miluag na ang akong dughan, migawas ko sa CR.

“Ugma sa buntag na lang pauli ngadto sa imong boarding house,” giingnan ko niya. “Lawom na’ng gabii.” “Dili mahimo,” matud ko. “May klase ko ugma sa 7:30.”

“Wa ka nay kasakyan. Sayo na la’g mata ugma sa buntag aron dili ka ma-late,” giingnan ko ni Paulo.

Wala na lang ko motingog. Wala ko na lang supaka si Paulo aron dili siya masuko. Dili ko gusto’g kagubot.

“Katulog na diha,” ni Paulo pa nga misandig sa headboard sa kama samtang nagpunay og yupyop sa sigarilyo.

Giduka na ko. Pun-an pa sa kalapoy sa akong lawas tungod sa gihimo’ng pagpahimulos ni Paulo sa akong pagkababaye, gusto na ko’ng mopahulay.

Mihigda ko sa kama. Apan nagpadaplin ko kay dili ko gusto’ng mahiduol ni Paulo. Mitakilid ko sa paghigda aron matalikdan ko siya. (Sumpayan)