Gula 7
“Sige Nong Retz, masahean tika, hukasa ang imong T-shirt kay ako usa nga haplasan,” matud ni Evelyn nga miabli dayon sa garapa sa gipalit niya’ng panghaplas. Gituman ni Loreto ang gisulti sa dalaga kaniya.
“Ubo sa katre Nong ug iplastar ang imong lawas aron mamaayo g’yud nako pagmasahe,” ni Evelyn nga mihuwad og gamay’ng haplas ngadto sa wala niya’ng palad. Iya dayon kini nga gihaplas sa buko-buko ni Loreto.
Namatud-an niya nga may gipamati g’yud si Loreto. Nagmulo kini nga gihilantan apan bugnaw kaayo ang iyang lawas. “Mura’g wala maka-circulate pag-ayo ang imong dugo Nong Retz mao nga gibati nimo ang grabe’ng kakapoy,” sa dalaga pa.
Miagulo si Loreto diha’ng misugod na sa pagmasahe si Evelyn sa iyang buko-buko. Nabatyagan ni Evelyn nga nanguto-kuto ang buko-buko ni Loreto ug ingon sa adunay nangapigsat sa ilawom nga maagian sa iyang paghapyod.
“Daghan ka man diay kaayo’g panuhot Nong Retz mao nga gikapoy kaayo ka. Sagdi lang kay mahuwasan ka ra karong taud-taod kun mahuman ka nako’g masahe,” giingnan ni Evelyn si Loreto.
Ingon sa inanay’ng gibalikan sa kabaskog si Loreto diha’ng milanat na og mga tunga sa oras nga pagsige’s balik-balik ni Evelyn sa paghapyud-hapyod sa iyang buko-buko. Gitukoran ni Evelyn sa iyang siko ang mga sampot ni Loreto.
Misamot pag-agulo si Loreto sa kaanindot sa iyang gibati. Miginhawa siya’g lawom. “Nindot ka man diay kaayo’ng momasahe Lyn,” giingnan niya ang dalaga. Gisunod ni Evelyn sa pagmasahe ang paa ug bitiis ni Loreto. “Tan-awa Nong Retz, mibalik na ang natural nimo nga kainit sa lawas nga namasahean ka. Misirkular na pagbalik ang imong dugo,” matud sa dalaga. (Sumpayan)