Nag-abot sila si Rex ug Joy sa Fuente Osmeña Circle nga naghuot sa mga tawo niadtong udtoha. Diha sa dalan, naglagubo na ang mga tambol sa dram ug biyugol sa matag Sinulog contingents nga mipakita sa ilang street dancing.
“Wa bay nahibawong sakop sa imong pamilya nga moanhi ka karon dinhi sa Fuente Osmeña Circle, Joy...?” ni Rex nga malipayon kaayong mikupot sa tuong kamot sa sekreto niyang uyab sa ilang dapit sa Hipodromo.
“Basta adlaw sa Sinulog, dili na magkuti sila’s papa ug mama. Busy ang parents ko sa pag-abi-abi sa among mga bisita. Ang ako sab nga duha ka magulang igsuong lalake, misuroy sab tingali sa ilang mga uyab...!”
“Lipay gyud ko matag adlaw sa Sinulog, Joy! Makahigayon gyud ta’g deyt! Kitang parehas nga mga kamanghuran, pig-utan kaayo sa atong mga ginikanang managsilingan! Wa sila kahibawo nga nagkauyab ta pinaagi sa teks!”
“Bitaw, Rex! Way maayong relasyon sa usa’g-usa ang atong mga parents sa atong dapit. Kumpetensya sa tindahang grocery, kontra partido sa politika matag eleksyon. Tag-as sila’g mga garbo. Kitang mga anak maoy maapektohan...!”
“Kaingon lagi ko, Joy, nga kaayo unta kon magsige la’g Sinulog kada adlaw, aron kahigayon ta’g deyt kanunay....!”
“Basta antos lang gyud ta ning sekreto tang relasyon sa atong dapit, Rex! Total, mogradwar naman ta’s atong tagsatagsa ka mga kurso sa kolehiyo, dili na unya makababag ang atong parents sa atong panaghigugmaay!”
“Bitaw! Sa edad nga 20, pulos na ta matured! Ning semestera parehas tang mogradwar! Ako sa civil engineering ug ikaw sa architecture, Joy!”
“Basta careful gyud tang duha, Rex, ha? Di ta padala sa bul-og sa atong gugma...!”
“Aw, kuntento naman ko sa atong kiss-kiss, Joy, sa lips-to-lips!”
“Kana gyud! Di una ta pahinayak, Rex...!”
“Happy Sinulog, Joy! I love you...!”
“Viva Senyor! Pit Senyor! Rex! I love you too....!”
Ug malipayong nag-agbayay sila si Rex ug Joy sa sulod sa Fuente Osmeña Circle, nga makahigayon lang og deyt sa sekreto nilang panag-uyab, matag kasaulogan sa Sinulog Festival. (Katapusan)