Gula 8
Pagkakita sa anak ni Zeny kang Ruben, mipahiyom ang bata. Nakatimaan tingali ang bata nga si Ruben apil sa miatiman kaniya diha nga naadmit pa siya sa ospital.
Gibati og kahinangop si Ruben nga ingon sa nakigsuod kaniya ang anak ni Zeny. Makatabang ang bata aron nga sugton siya ni Zeny. “Gikan dinhi sa plaza, mohapit ta sa baligyaanan og ice cream,” ni Ruben.
“Yehey!! Ice cream!!” wala tuyoa nga nakasinggit ang anak ni Zeny sa kalipay diha nga nadungog niya nga mangadto sila og tindahan nga namaligya og ice cream.
“Sige, makaduwa ka pa og balik dong ug kun kapoyon ka na, mangaon dayon ‘ta’g ice cream,” giingnan ni Ruben ang bata.
Wala magtingog si Zeny nga nagtan-aw ni Ruben nga ingon sa nalingaw kaayo nga mihangop sa iyang anak. Mibalik pagdagan-dagan sa public plaza ang anak ni Zeny.
“Maayo kay mitagad nimo ang akong anak. Himilian kaayo na’ng bataa og tawo nga iyang amigohon,” matud ni Zeny. Mipahiyom si Ruben ug giingnan si Zeny nga dili na problema alang kaniya kun siya ang mangamahan sa bata.
Mibalik si Ruben sa pagpasumbingay kang Zeny aron dawaton na niini ang iyang gugma. “Maayo unta kun wad-on na nimo sa imong huna-huna Zen nga usa lang ka pagbugal-bugal ang akong pagpaninguha nimo. Maayo unta og maangkon ko na ang imong gugma sa dili pa ako mobalik sa barko.”
Mitutok na usab si Zeny kang Ruben. “Sagdi lang Ruben, motuo na ko nga wala ka magbinuang nako. Apan dili pa ako makatubag kanimo pagka karon,” matud ni Zeny sa tingog nga puno sa pagmahal.
“Salamat kaayo Zen. Andam ako nga magpaabot. Matud pa bitaw nila nga ang gugma nga matinud-anon, makapaabot,” ni Ruben pa. (Sumpayan)